Մեծ Բրիտանիայի վարչապետ Դեւիդ Քեմերոնը եւ Եվրոպայի Խորհրդի նախագահ Հերման Վան Ռոմպեյը համակարծիք են Ռուսաստանի վրա ճնշումներ գործադրելու հարցում՝ կապված ուկրաինական դեպքերի հետ: Բրիտանական կառավարության ղեկավարի պաշտոնական ներկայացուցիչը հայտարարել է, որ Քեմերոնն ու Վան Ռոմպեյը հեռախոսազրույց են ունեցել Եվրամիության գագաթաժողովի նախաշեմին, որը կայանալու է օգոստոսի 30-ին, Բրյուսելում:
Ըստ ԻՏԱՌ ՏԱՍՍ-ի, զրույցի ընթացքում կողմերն ընդգծել են, որ Եվրամիությունը պետք է շարունակի ճնշում գործադրել ռուսական ղեկավարության վրա՝ լարված իրավիճակը մեղմելու համար:
ԵՄ գագաթաժողովի համատեքստում ուկրաինական ճգնաժամը Քեմերոնը քննարկել է նաեւ Գերմանիայի կանցլեր Անգելա Մերկելի հետ: Երկու երկրների ղեկավարները կարծում են, որ Եվրոպայի Խորհուրդը պետք է արձագանքի Ուկրաինայի արեւելքում պահպանվող իրադրությանը: Քեմերոնն ու Մերկելն ընդգծել են, որ ճգնաժամը ռազմական լուծում ունենալ չի կարող, իսկ ռուսական ղեկավարությունը պետք է բանակցություններ սկսի:
