Արեւմտյան Եվրոպան մեծ դժվարությամբ կարող է պաշտպանել իրեն ռուսական ագրեսիայի դեպքում, հայտարարել է Եվրոպայում ՆԱՏՕ-ի ուժերի գերագույն գլխավոր հրամանատարի նախկին տեղակալ Ռիչարդ Շիրեֆը: Նրա կարծիքով, ՆԱՏՕ-ի անդամ-երկրները պետք է վերազինվեն Ռուսաստանի կողմից աճող սպառնալիքին ընդառաջ, հաղորդում է DELFI-ն:
Շիրեֆը խոստովանել է, որ Եվրոպայի երկրներին վերազինման կոչը մեծ ժողովրդականություն չի վայելում՝ հաշվի առնելով ներկա տնտեսական խնդիրները, սակայն հավելել է, որ Հյուսիսատլանտյան դաշինքը «պետք է վերականգնի իր ներուժը»:
Նրա խոսքով՝ Եվրոպայի երկրները «քայքայել են իրենց ռազմական ներուժը» եւ այժմ պետք է «մտնեն իրենց գրպանն ու պաշտպանության համար գումարներ ծախսեն»:
Գեներալ Շիրեֆն ընդգծել է, որ «ակնհայտ հակասություններ է տեսնում ՆԱՏՕ-ի հրամանատարության՝ մեր պարտավորությունների վերաբերյալ հռետորաբանության եւ թե ինչի են պատրաստ ՆԱՏՕ-ի երկրները գործնականում»:
Ուելսում կայանալիք ՆԱՏՕ-ի սեպտեմբերյան գագաթնաժողովը կարող է Ռուսաստանին «համոզիչ կերպով ցույց տալ», որ ՆԱՏՕ-ն պաշտպանության հարցերին լուրջ է վերաբերվում, կարծում է գեներալ Շիրեֆը: Նա նաեւ հավելել է, որ Եվրոպայի անվտանգության հետ կապված իրավիճակը փոխվել է ՌԴ-ին Ղրիմի միացումից եւ Ուկրաինայի արեւելքում հակամարտություն սկսվելուց հետո:
