Ինքնահռչակ Դոնեցկի ժողովրդական հանրապետության վարչապետ Ալեքսանդր Զախարչենկոն հայտարարել է, որ ռուսամետ ակտիվիստների շարքում ՌԴ-ից եկած 3-4 հազար կամավոր կա: Նրա այս ուղերձը հեռարձակել է «Ռոսիա 24» հեռուստաալիքը:
«Այսօր շատ հարցեր են տալիս այն մասին, թե ինչպես կիսապարտիզանական ջոկատներից ԴԺՀ-ի բանակը վերածվեց հզոր կազմակերպության, որն ընդունակ է ոչ միայն դիմակայել Ուկրաինայի զինված ուժերին, այլեւ մարտի դաշտում հաղթանակ տանել:
Կիեւում եւ Արեւմուտքում կրկնում են ռուսական զինված ներխուժման մասին, որպեսզի ինչ-որ կերպ արդարացնեն այն զանգվածային ձախողումները, որն ուկրաինական բանակը կրում է արդեն մեկ ամիս:
Մենք երբեք չենք թաքցրել, որ մեր շարքերում շատ ռուսաստանցիներ կան, որոնց օգնությունը չլինելու պարագայում մեզ համար շատ դժվար կլիներ մարտնչել», —ասել է Զախարչենկոն:
Ըստ նրա՝ ռուսական կամավորների շարքում շատ նախկին զինվորականներ կան: «Մեր շարքերում կռվում են նաեւ ներկայիս զինվորականներ, որոնք արձակուրդի փոխարեն մեզ մոտ են եկել ազատության համար պայքարելու: Դա բնորոշ է միայն ռուսներին», - ասել է նա՝ ընդգծելով, որ ռուսաստանցի որոշ կամավորներ, ցավոք, զոհվում են: