Լեռնային Ղարաբաղի Հանրապետության անկախության եւ ինքնորոշման իրավունքի ճանաչման մասին Կալիֆորնիայի նահանգային Սենատի կողմից օգոստոսի 27-ին ընդունված բանաձեւը համարվում է վճռորոշ ու պատմական քայլ՝ այնպիսի մի նահանգում, ուր բնակություն է հաստատել արտերկրի խոշորագոյն հայ համայնքը: Այս մասին հայտարարություն է տարածել Արեւմտյան Ամերիկայի Կենտրոնական Կոմիտեն:
Հայտարարությունում նաեւ ասվում է.
«ՀՅԴ Արեւմտյան Ամերիկայի Կենտրոնական Կոմիտեն ողջունում է այս հանդուգն ու անկյունադարձային քայլը, որը փաստացի արգասիքն է ո՛չ միայն ամերիկահայ համայնքի տքնաջան աշխատանքի, այլ նաեւ՝ Կալիֆորնիայի նահանգային պաշտոնատարների կողմից հաստատումն է բոլոր ժողովուրդների ինքնորոշման իրավունքի:
Սույն բանաձեւը վճռական կարեւորություն ունի այժմ, երբ Ադրբեջանի պատերազմական հոխորտագին հռետորությունը եւ վերջերս իր բազմիցս կրկնած զինադադարի խախտումները, ինչպես նաեւ թուրքական ու ադրբեջանական լոբբիստական ջանքերը ուղղված էին ձախողության մատնելու սույն քայլը:
Բանաձեւը է՛լ ավելի է վերահաստատում ազատագրական պայքարի հիմնադրույթը, որը ծավալվել է մեր ժողովրդի կողմից եւ պիտի խթան հանդիսանա համայն հայությանը, շարունակելու իր ջանքերը՝ ի խնդիր արդարության եւ ամբողջական ազատագրության:
Նշելով այս հավաքական հաղթանակը, մենք մեծապես գնահատում ենք Հայ Դատի Հանձնախմբի գործիչներին, ովքեր վճռականորեն եւ հետեւողականորեն աշխատում են հիշյալ նպատակի կենսագործման ուղղությամբ:
Հիշեցնենք, որ օգոստոսի 27-ին, Կալիֆորնիայի նահանգային Սենատն ընդունել է Լեռնային Ղարաբաղի Հանրապետության անկախության եւ ինքնորոշման մասին բանաձեւը:
Քվեարկված բանաձեւը նաեւ կոչ է անում ԱՄՆ-ին՝ ճանաչել Լեռնային Ղարաբաղի Հանրապետությունը՝ ազդարարելով, որ ամերիկյան ժողովուրդն աջակցում է անկախ եւ պատմականորեն հայկական այս երկրի քաղաքացիների ազգային եւ ժողովրդավարական ձգտումները:
Պատմական այս քվեարկությունը, մասնավորապես, քաջալերում է Արցախի շարունակական ջանքերը՝ որպես ազատ եւ անկախ պետություն զարգանալու ճանապարհին, եւ պաշտոնապես կոչ է անում ԱՄՆ նախագահին եւ Կոնգրեսին՝ աջակցել Լեռնային Ղարաբաղի Հանրապետության ինքնորոշմանն ու ժողովրդավարական անկախությանը: