Լոռու մարզի Գուգարքի տարածաշրջանի Մեղրուտ գյուղի մոտ օգոստոսի 27-ին տեղի ունեցած ողբերգական ավտովթարի հետեւանքով մահացած 3 եւ վիրավորված 2 ուղեւորները Գուգարք գյուղի բնակիչներն են, բարեկամներ: Այս մասին NEWS.am-ին ասաց համայնքի ղեկավար Աշոտ Աշուղյանը:
«Միասին սար էին գնում՝ խոտհնձի, երբ էդ դեպքը պատահել է: 5 տղամարդ է եղել մեքենայի մեջ, հայր ու որդի մահացել են, վարորդն էլ է մահացել, մյուս երկուսն էլ տեղափոխվել են հիվանդանոց, վիճակները ծանր է: Դժբախտ ընտանիք է էլի. անցած տարի էլ Ռադիկ Սողոմոնյանի եղբայրը մահացավ»,- ասաց նա:
Նշենք, որ դեպքը տեղի է ունեցել ժամը 16:00-ի սահմաններում, «Գազ 66» մակնիշի ավտոմեքենան դուրս է եկել ճանապարհի երթեւեկելի գոտուց եւ 20 մետր գլորվելով՝ հայտնվել սարի տակ: Պատահարի հետեւանքով վարորդը՝ 55-ամյա Հրաչիկ Առաքելյանը, հայր եւ որդի 36-ամյա Ռադիկ եւ 11-ամյա Արմեն Սողոմոնյանները մահացել են: Մյուս երկու ուղեւորները՝ հայր եւ որդի Արշայուլս եւ Դավիթ Պողոսյանները, տեղափոխվել են հիվանդանոց: