Սահմանամերձ գոտուց եկած առաջին կուրսի ուսանողների համար նախատեսվում է կիրառել մինչեւ 30 տոկոս ուսման վարձի զեղչ: Այս մասին բուհերի ռեկտորների հետ աշխատանքային հանդիպման ժամանակ նշել է Հայաստանի կրթության եւ գիտության նախարար Արմեն Աշոտյանը:
Նախարարը բուհերի ղեկավարներին առաջարկել է, ինչպես նախորդ երկու տարիներին, այս տարի եւս սիրիահայ ուսանողների համար բուհերում ուսման վարձը հավասարեցնել ՀՀ քաղաքացիների համար նախատեսված չափերին: Կառավարության առաջարկությամբ եւ ՀՀ վարչապետի հանձնարարությամբ այժմ մշակվում է նաեւ սոցաիալական աջակցության ծրագիր՝ վերջին շրջանում գնդակոծության ենթարկված սահմանամերձ համայնքների ուսանողների համար: Սահմանամերձ գոտուց եկած առաջին կուրսի ուսանողների համար նախատեսվում է կիրառել մինչեւ 30 տոկոս ուսման վարձի զեղչ, իսկ արդեն 2-րդ կուրսից սկսած զեղչը կպահպանվի, եթե տվյալ ուսանողը կապահովի բուհերի կողմից սահմանված միջին որակակական գնահատականի՝ ՄՈԳ-ի շեմը:
Ընդգծելով, որ կառավարության ծրագրով այս տարի նախատեսվում է աջակցել մինչեւ 1500 սոցիալապես անապահով ուսանողների՝ նախարարը նշել է, որ բարձրագույն ուսումնական հաստատությունները մինչեւ սույն թվականի սեպտեմբերի 17-ը ՀՀ կրթության եւ գիտության նախարարություն պետք է ներկայացնեն պետության կողմից ուսանողական նպաստի ձեւով ուսման վճարի մասնակի փոխհատուցման նպատակով` ուսանողի միջին որակական գնահատականի նվազագույն շեմը հաղթահարած եւ ընտանիքների անապահովության գնահատման համակարգում հաշվառված` ուսանողների անվանացանկը:
Բացի այդ, համաձայն բարձրագույն եւ հետբուհական կրթության մասին օրենքում կատարված փոփոխության՝ այս ուսումնական տարվանից սկսած բարձրագույն ուսումնական հաստատությունները պարտավոր են ուսանողներից հավաքագրված վարձվաճարների առնվազն 7 տոկոսը, իբրեւ սոցիալական աջակցություն վերադարձնել ուսանողներին՝ հատկացնելով համապատասխան ծավալի ուսման վարձի զեղչեր: Օրենքով նախատեսված են նաեւ, թե որ կարագավիճակում գտնվող ուսանողները կարող են ներգրավվել ուսման վարձի զեղչային համակարգում: Նախարար Ա. Աշոտյանը, դիմելով ռեկտորներին, կոչ է արել բուհական բյուջեները պլանավորելիս օրենքի այս պահանջը անպայման նկատի ունենալ եւ ապահովել պետության կրթական քաղաքականության իրագործումը:
Նախարարը ռեկտորների ուշադրությունը հրավիրել է նաեւ 2015 թվականին Երանում կայանալիք Բոլոնիայի նախարարական գագաթաժողովի նախապատրաստական աշխատանքներին՝ կոչ անելով բուհերին ակտիվություն ցուցաբերել:
Հանդիպման ընթացքում քննարկվել են նաեւ բուհերի հեռակա ուսուցման համակարգում ընդունելությանը, զարգացման ծրագրերն եւ մի շարք այլ հարցերի վերաբերող հարցեր:
