Պետական հատուկ ծառայություն իրականացնող պաշտոնատար անձինք չարաշահել են իրենց պաշտոնեական պարտականությունները, որի հետեւանքով էական վնաս է պատճառվել պետության օրինական շահերին:
ՀՔԾ մամուլի ծառայությունից հայտնում են, որ ՀՀ ոստիկանության ներքին անվտանգության վարչությունից ստացված ծառայողական քննության նյութերի քննարկմամբ պարզվել է, որ ՀՀ ոստիկանության Երեւան քաղաքի վարչության Մաշտոցի բաժնի ՔՀԲ աշխատակիցները, ՀՀ քաղաքացուց բանավոր տեղեկություններ ստանալով, անհայտ անձի կողմից իր բնակարանից 2013թ. հոկտեմբերին գողություն կատարելու մասին հաղորդումը չեն ընդունել, չեն գրանցել եւ բացահայտման ուղղությամբ չեն իրականացրել իրենց պարտականությունները:
Պարզվել է նաեւ, որ ՀՀ ոստիկանության ՔԳՎ Երեւան քաղաքի քննչական վարչության Մաշտոցի քննչական բաժնի քննիչն իր վարույթում քննվող քրեական գործով մեղադրյալ Ռոբերտ Մ.-ին հետախուզում հայտարարելու մասին որոշման մեջ նշել է իրականությանը չհամապատասխանող ծննդյան տարեթիվ, որի հետեւանքով Ռոբերտ Մ.-ին հաջողվել է Բագրատաշենի անցակետով հատել հայ-վրացական սահմանը:
Դեպքի առթիվ ՀՀ հատուկ քննչական ծառայությունում հարուցվել է քրեական գործ` ՀՀ քրեական օրենսգրքի 308-րդ հոդվածի 1-ին մասի հատկանիշներով:
Կատարվում է նախաքննություն: