Ամերիկյան Քալիֆորնիա նահանգի սենատի կողմից Լեռնային Ղարաբաղի Հանրապետության ճանաչման մասին բանաձեւի ընդունումը բոլոր հայերի համար մեծ եւ նշանակալի իրադարձություն է: Այդ մասին NEWS.am-ի թղթակցի հետ զրույցում հայտարարեց Լեռնային Ղարաբաղի Հանրապետության նախագահի մամուլի քարտուղար Դավիթ Բաբայանը:
Բաբայանի խոսքով՝ ԼՂՀ-ն, Հայաստանը եւ Սփյուռքը արդեն վաղուց են ջանքեր գործադրում Ղարաբաղի միջազգային ճանաչման ուղղությամբ: «Քալիֆորնիայի սենատի կողմից բանաձեւի ընդունումը նշանակում է, որ այդ նահանգը, վերջապես, ընդունել է Լեռնային Ղարաբաղի Հանրապետության անկախությունը: Սա շատ խորհրդանշական է. Քալիֆորնիան ճանաչեց Ղարաբաղի անկախությունը սեպտեմբերի 2-ի՝ ԼՂՀ-ի անկախության հռչակման օրվա նախօրեին: Սա Քալիֆորնիայի բնակիչների նվերն է արցախցիներին»:
Բաբայանը նաեւ նշեց, որ բանաձեւի ընդունումը ԼՂՀ անկախության միջազգային ճանաչման գործում նոր որակ մտցրեց, քանի որ տնտեսական եւ ժողովրդագրական ասպեկտներով Քալիֆորնիա նահանգը կարելի է համեմատել աշխարհի խոշորագույն երկրների հետ. «Կարելի է ասել, որ Ղարաբաղի անկախությունը ընդունել է աշխարհի խոշոր պետություններից մեկը: Այս փաստը ԼՂՀ անկախության ճանաչման աշխարհագրության ընդլայնման տեսակետից նոր ազդակ ու հնարավորություն է»:
Նախագահի մամուլի քարտուղարը նաեւ կարծիք հայտնեց, որ ԼՂՀ-ի անկախության ճանաչումը վկայում է այն մասին, որ Ղարաբաղը կայացած ժողովրդավարական պետություն է: