Հայտնաբերվել է Մայիսյան գյուղի ջրանցքն ընկած 7-ամյա երեխայի դին:

Ավելի վաղ NEWS.am-ը հայտնել էր, որ Շիրակի մարզի Մայիսյան համայնքում օգոստոսի 27-ին ժամը 19:00-ի սահմաններում 7-ամյա երեխա է ընկել գյուղի ջրանցքը:

Դեպքի վայր էր մեկնել մեկ մարտական հաշվարկ: Որոնողական աշխատանքների արդյունքում փակվել է ջրանցքի հոսքը, որպեսզի հեշտ լինի տղային գտնել: Որոնողական աշխատանքներին ներգրավվել են Կամո, Հացիկ եւ Ոսկեհատ գյուղերից 60 գյուղացի:

Օգոստոսի 28-ին, ժամը 11.40-ի դրությամբ Շիրակի մարզի Հացիկ-Շիրակ գյուղերի միջեւ ընկած վայրից 8 կմ հեռավորության վրա` Շիրակ գյուղի մոտակայքում, հայտնաբերվել է նախորդ օրը ջրանցքն ընկած Մայիսյան գյուղի բնակիչ` 7-ամյա Գ. Գ.-ի դին:

NEWS.am-ի տեղեկություններով՝ ջրանցքի մեջ ընկած երեխան՝ Գեւորգը, 12-ամյա եղբոր հետ է եղել, երբ ընկել է ջուրը, եղբայրն էլ չի կարողացել օգնել ու տուն է վազել ծնողներին օգնության կանչելու:

Մայիսյանի գյուղապետարանի աշխատակազմի քարտուղար Հակոբ Հունանյանը NEWS.am-ի հետ զրույցում ասել էր, որ իրենք դեպքի մանրամասներին տեղյակ չեն, քանի որ Գեւորգի եղբայրը կցկտուր տեղեկություններ է հայտնում: Հակոբ Հունանյանի խոսքով՝ եղբայրները մտավոր խնդիրներ ունեն: «Եղբայրն էլ չի կողմնորոշվում՝ ինչ պատմի, չի էլ կողմնորոշվում՝ դեպքը ոնց է տեղի ունեցել, մեկ ասում է՝ քայլել են ջրի վրայի կամրջակով, մեկ էլ ասում է՝ ափին են եղել, սայթաքել, ընկել է ու ջուրը տարել է, բայց դեռ ոչինչ չենք գտել տղայից»,- ասել էր նա:

Նշենք, որ ջրանցքը հասնում է մինչեւ Կառնուտի լիճ: