ԱՄՆ Քալիֆորնիա նահանգի Սենատի կողմից ԼՂՀ անկախության ճանաչման մասին ընդունված բանաձեւը առաջընթաց է Ղարաբաղի միջազգային ճանաչման ճանապարհին: Այս մասին NEWS.am-ի թղթակցի հետ զրույցում նշել է ԱԺ փոխնախագահ, ՀՀԿ մամուլի քարտուղար Էդուարդ Շարմազանովը:
Նրա խոսքով՝ ԼՂՀ ճանաչման մասին բանաձեւի ընդունումը ԱՄՆ ամենաազդեցիկ նահանգներից մեկի կողմից նշանակում է, որ միջազգային հանրությունը հասկանում է՝ ԼՂՀ-ն դե-ֆակտո անկախ պետություն է եւ Ղարաբաղի միջազգային ճանաչումն այլընտրանք չունի:
«Շարունակվում է ազգերի ինքնորոշման իրավունքի հաղթարշավը, ինչը եւս մեկ անգամ ապացուցում է, որ ԼՂՀ-ն դե-ֆակտո անկախ պետություն է»,-ասել է Շարմազանովը:
Նա նաեւ կարծիք է հայտնել, որ Քալիֆորնիայի Սենատի որոշումը օրինակ կդառնա ոչ միայն ԱՄՆ մյուս նահանգների, այլեւ աշխարհի այլ երկրների համար:
Ավելի վաղ NEWS.am-ը հայտնել էր, որ Քալիֆորնիայի նահանգային Սենատը օգոստոսի 27-ին ընդունել է Լեռնային Ղարաբաղի Հանրապետության անկախության եւ ինքնորոշման մասին բանաձեւը:
Չորեքշաբթի քվեարկված բանաձեւը նաեւ կոչ է անում ԱՄՆ-ին՝ ճանաչել Լեռնային Ղարաբաղի Հանրապետությունը՝ ազդարարելով, որ ամերիկյան ժողովուրդն աջակցում է անկախ եւ պատմականորեն հայկական այս երկրի քաղաքացիների ազգային եւ ժողովրդավարական ձգտումները:
Պատմական այս քվեարկությունը, մասնավորապես, քաջալերում է Արցախի շարունակական ջանքերը՝ որպես ազատ եւ անկախ պետություն զարգանալու ճանապարհին, եւ պաշտոնապես կոչ է անում ԱՄՆ նախագահին եւ Կոնգրեսին՝ աջակցել Լեռնային Ղարաբաղի Հանրապետության ինքնորոշմանն ու ժողովրդավարական անկախությանը:
