Վանաձորում հոկտեմբերի 12-ին դանակահարության պատճառով մահացած 15-ամյա Դավիթ Հովակիմյանի գործով ձերբակալվել է «Վանաձոր» բժշկական կենտրոնի վիրաբուժական բաժանմունքի վարիչ Վլադիմիր Ղուկասյանը: Այս մասին NEWS.am-ին ասաց հիվանդանոցի փոխտնօրեն Արտակ Եդոյանը:
«Վլադիմիր Ղուկասյանը ձերբակալվել է 2 օր առաջ: Իհարկե, մենք ամեն կերպ սատարելու եւ աջակցելու ենք մեր բժշկին, որովհետեւ նա այն մարդը չէ, ում պետք էր ձերբակալել. նա արդեն 25 տարի աշխատում էր մեզ մոտ, Լոռու մարզի գլխավոր վիրաբույժն էր»,- ասաց նա:
Արտակ Եդոյանի խոսքով՝ Վլադիմիր Ղուկասյանը ձերբակալվել է մասնագիտական պարտականությունների նկատմամբ անբարեխիղճ վերաբերմունք դրսևորելու և դրանք ոչ պատշաճ կատարելու հետևանքով անզգուշությամբ բուժվող հիվանդի մահն առաջացնելու կասկածանքով: Նրա ձերբակալությունը կապված է 2013թ.-ի հոկտեմբերի 12-ին մահացած Դավիթ Հովակիմյանի հետ. տղայի կյանքը հնարավոր կլիներ փրկել, եթե բժիշկը չթերանար:
«Թե ինչքանով է սխալ մեր բժիշկը, պետք է ճշտեք իրավապահ մարմիններից, բայց նորից եմ ասում՝ նա այն մարդը չէ, ում պետք էր ձերբակալել»,- ավելացրեց հիվանդանոցի փոխտնօրենը:
Հիշեցնենք, որ ըստ ոստիկանության՝ հոկտեմբերի 12-ին, ժամը 19.35-ին, «Վանաձոր» բժշկական կենտրոն է տեղափոխվել Երեւանի բնակիչ, 15-ամյա Դավիթ Հովակիմյանը՝ «կրծքավանդակի ծակած վերք» ախտորոշմամբ: Նույն օրը ժամը 22.00-ի սահմաններում Դ. Հովակիմյանը հիվանդանոցում մահացել է: Հոկտեմբերի 13-ին, ժամը 01.50-ին սպանությունը կատարելու կասկածանքով իր բնակարանից բերման է ենթարկվել 1991թ. ծնված, նախկինում դատապարտված Կարեն Կ.-ն՝ «Քուրդ» մականունով: Պարզվել է, որ նա հոկտեմբերի 12-ին ժամը 19.20-ի սահմաններում Վանաձորի Կ. Դեմիրճյան փողոցի հարևանությամբ գտնվող այգում, վիճաբանության ժամանակ, դանակով հարվածել է Դ. Հովակիմյանին և պատճառել մահ: Կարեն Կ.-ն ձերբակալված է: Նախաքննությունը շարունակվում է: