Ուկրաինայի նախկին վարչապետ Յուլյա Տիմոշենկոն երկրի նախագահ Պյոտր Պորոշենկոյին կոչ է անում Դոնեցկում եւ Լուգանսկում պատերազմական դրություն հայտարարել: Այս մասին նա լրագրողներին հայտնել է Կիեւում, փոխանցում է ՈՒՆՆ-ն:
Ըստ նրա՝ օգոստոսի լույս 28-ի գիշերը Ռուսաստանը ռազմական ներխուժում է իրականացրել Ուկրաինայի տարածք:
«Գիշերը ռուսական բանակի ներխուժում է եղել... Մենք Ուկրաինայի արեւելքում կատարվողը ահաբեկչություն չենք կարող անվանել: Հարկավոր է ազնվորեն խոստովանել՝ Ռուսաստանը պատերազմ է պարտադրում», - ընդգծել է նա եւ կոչ արել անհապաղ պատերազմական դրություն հայտարարել Դոնեցկում եւ Լուգանսկում: Սա, ըստ նրա, կուժեղացնի պետության պաշտպանունակությունը:
Նախկին վարչապետը նաեւ նախագահին կոչ է արել իր ձեռքը վերցնել պաշտպանությունը կառավարելու լծակները: