Հայաստանի աշխատանքի եւ սոցիալական հարցերի նախարարության սոցիալական ապահովության պետական ծառայության նախկին պետի` Վազգեն Խաչիկյանի և ծառայության 12 նախկին աշխատակիցների գործով դատաքննությունն այսօր՝ օգոստոսի 28-ին, ավարտվեց: Այս մասին NEWS.am-ին ասաց ամբաստանյալներից Համլետ Մարտիրոսյանի եւ Հրանուշ Դանիելյանի պաշտպան Հովիկ Արսենյանը:
«Թվաբանական սխալ կար մեղադրանքի մեջ, թե ինչքան է յուրաքանչյուրը յուրացրել: Ամբաստանյալներն իրենց մեղավոր չճանաչեցին եւ դատաքննության փուլն ավարտվեց: Հաջորդ դատական նիստը կկայանա սեպտեմբերին 25-ին. դատախազները մեկ ամիս պահանջեցին մեղադրական ճառին պատրաստվելու համար»,- ասաց նա:
Փաստաբանի խոսքով՝ իր պաշտպանյալները պետք է արդարացվեն. «Սպասենք մեղադրական ճառին, որից հետո արդեն կարծիք կհայտնենք»:
Հիշեցնենք, որ Վազգեն Խաչիկյանին մեղադրանք է առաջադրվել նրա համար, որ նա զբաղեցնելով ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետի պաշտոնը, ծառայության մի շարք պաշտոնատար անձանց հետ, 2006–2010թթ. ընկած ժամանակահատվածում, օգտագործելով իրենց պաշտոնեական դիրքը հափշտակել են իրենց վստահությանը հանձնված, մահացած կամ ՀՀ տարածքից բացակայող կենսաթոշակառուների վճարումը կասեցված կենսաթոշակի առանձնապես խոշոր չափերի` 260.956.681 ՀՀ դրամ գումարները, բացի այդ` Վազգեն Խաչիկյանը, ըստ մեղադրական եզրակացության, խարդախությամբ հափշտակել է պետական բյուջե վերականգնման ենթակա, առանձնապես խոշոր չափերի` 29.000.000 ՀՀ դրամ գումարը:
