Ամերիկացի քահանան կոչ է արել ԱՄՆ Սահմանադրության մեջ նոր ուղղում մտցնել, որի համաձայն՝ սեռական փոքրամասնությունների համայնքի ներկայացուցիչները պետք է 10 տարվա տաժանակիր աշխատանքների ուղարկվեն:
Ըստ «The Raw Story»-ի, քահանա Մայքլ Վ.Ուիլյամսը, ով իր կայքն օգտագործում է պահպանողական քրիստոնեական գաղափարաբանության վրա հիմնված քաղաքականության դասավանդման համար, սեռական փոքրամասնությունների ներկայացուցիչների պատժի նոր եղանակ է առաջարկում:
Հոգեւորականն իր կայքում այս թեմայի շուրջ դատողությունների հոլովակ է տեղադրել եւ պնդում է, որ վերջին 50 տարվա ընթացքում քրիստոնյաներն ավելի հանդուրժողական են դարձել նույնասեռականների հանդեպ:
«Եթե նախկինում նույնասեռականությունը քրեական հանցանք էր համարվում յուրաքանչյուր պետությունում, ապա այժմ ապաքրեականացրել են եւ թույլ տվել հրապարակային ցուցադրել,- նշում է Ուիլյամսը:- Եվ ահա այն ժամանակ, երբ քրիստոնեությունն առավել հանդուրժողական է դառնում նույնասեռականության հանդեպ, նույնասեռականներն ավելի անհանդուրժողական են դառնում մեր հանդեպ»:
Հոգեւորականի խոսքով՝ հավատացյալները պետք է նախաձեռնեն ԱՄՆ Սահմանադրության նոր ուղղումների ընդունումը, որպեսզի Ամերիկան դառնա հուդայական-քրիստոնեական ու ավանդական բարոյագիտությամբ երկիր:
«Ժամանակն է, որպեսզի քրիստոնյաները հետեւեն Աստծուն ու նրա խոսքին, պետք է նույնասեռականությունն արգելել քրեական պատասխանատվությամբ,- համոզված է հոգեւորականը:- Ակտիվիստներից ու անպատասխանատու բյուրոկրատներից նրանց հեռու պահելու միակ եղանակը սահմանադրական ուղղումներ են»:
Ուիլյամսը կարծում է, որ լավագույն եղանակը 10 տարվա տաժանակիր աշխատանքն է, եւ իր համախոհներին խորհուրդ է տալիս օրենսդիրներից ԱՄՆ Սահմանադրության նոր ուղղում պահանջել: