Ուկրաինայի մայրաքաղաքում ցուցարարները փակել են քաղաքի գլխավոր փողոցը՝ Կրեշչատիկ՝ վանկարկելով՝ «Կիեւ, արթնացիր» եւ պահանջում են հակաահաբեկչական գործողությունների ղեկավարների հրաժարական, հաղորդում է UNN-ը:
Ուկրաինայի զինված ուժերի գլխավոր շտաբի շենքի մոտ հավաքվածները պահանջել են երկրի նախագահ Պյոտր Պորոշենկոյի իմփիչմենթը: Ակտիվիստները նաեւ պահանջել են երկրի արեւելքում ուժային գործողությունների բոլոր ղեկավարների այդ թվում՝ պաշտպանության նախարար Վալերի Գելետեյի հեռացում:
Պետպաշտոնյաները դուրս են եկել շփվելու ցուցարարների հետ: Նրանց թվում են նախագահի վարչակազմի ներկայացուցիչներն ու պաշտանության նախկին նախարար Միխայիլ Կովալը:
Ակտիվիստները ընթերցել են իրենց պահանջները.
«Մենք պահանջում ենք անհապաղ օգնություն ցուցաբերել Իլովայսկի զինվորականներին, նրանց տրամադրել ծանր սպառազինություն եւ տեխնիկա, անհրաժեշտության դեպքում՝ անձնակազմի հետ: Նաեւ պահանջում ենք Ուկրաինայի ԶՈՒ-ի շարքեր զորակոչել կամավորներին եւ մարտական փորձ ունեցող պրոֆեսիոնալներին: Եւս մեկ պահանջ՝ ռազմական դրություն մտցնել. եթե ոչ ողջ Դոնբասում, ապա գոնե Իլովայսկում», - հայտարարել է ակտիվստներից մեկը:
Ցուցարարները նաեւ որոշել են բանակցային խումբ ստեղծել Ուկրաինայի նախագահ Պյոտր Պորոշենկոյի հետ բանակցություններ անկացնելու համար: