Ղարաբաղյան հակամարտության գոտու շփման գծում միջադեպերի հետաքննության մեխանիզմներ ստեղծելու համար ընդամենը քաղաքական կամք է հարկավոր, սակայն հենց այդ Ադրբեջանի մոտ բացակայում է:
Այս մասին NEWS.am-ի թղթակցի հետ զրույցում հայտարարեց Արցախի Հանրապետության նախագահի մամուլի խոսնակ Դավիթ Բաբայանը՝ անդրադառնալով Հայաստանում Ռուսաստանի արտակարգ եւ լիազոր դեսպան Իվան Վոլինկինի հայտարարությունն այն մասին, որ հետաքննությունների մեխանիզմ է անհրաժեշտ՝ միջադեպերի հնարավոր վտանգը նվազեցնելու նպատակով:
Ղարաբաղյան կողմը, ըստ Դավիթ Բաբայանի, միշտ հայտարարել է, որ հանդես է գալիս նշված մեխանիզմների ստեղծման օգտին: «Այդ ենթադրում է տեխնիկական խնդիրների լուծում, որոնք պետք է մշակեն հակամարտության բոլոր կողմերը՝ ԵԱՀԿ առաքելության դիտորդների հետ համատեղ: Դրա համար գոյություն ունեն համապատասխան չափանիշներ, եւ այդ հնարավոր է իրականացնել տեխնիկական միջոցների ներդրմամբ»,- ընդգծեց Արցախի նախագահի մամուլի խոսնակը: