ՆԱՏՕ-ի արեւմտյան ռազմաքաղաքական դաշինքի պետությունները չեն մասնակցի Ուկրաինայում տեղի ունեցող ռազմական գործողություններին, սակայն կարող են օգնել ուկրաինական իշխանություններին անհրաժեշտ ռազմական տեխնիկայի տրամադրմամբ: Նման կարծիք է հայտնել Լեհաստանի Սեյմում պաշտպանության հարցերի հանձնաժողովի ղեկավար Ստեֆան Նեշելովսկին:
«Այժմ անհնար է ՆԱՏՕ-ի երկրների պատերազմը Ռուսաստանի հետ»,- ասել է նա՝ մեկնաբանելով արեւմտյան աշխարհի հնարավոր արձագանքը «ռուսաստանցիների՝ արդեն բացահայտ ռազմական ագրեսիային»,- հաղորդում է ՈւՆԻԱՆ-ը:
«Ուկրաինան ռազմական միջամտություն թող չակնկալի: Հնարավորություն չէ, որ նրանք իրենց զորքերը մտցնեն»,- հավելել է պատգամավորը՝ նկատելով, որ Ռուսաստանը, ըստ էության, հիմա հենց դա է օգտագործում:
Լեհաստանի «Քաղաքացիական հարթակ» իշխող կուսակցությունը ներկայացնող պատգամավորը նշել է, որ Արեւմուտքը կարող է ազդել իրավիճակի զարգացման վրա՝ դիվանագիտական գործիքների, տնտեսական պատժամիջոցների եւ ուկրաինական իշխանությանը ռազմական աջակցության միջոցով: Միաժամանակ, նա նշել է, որ տնտեսական պատժամիջոցները վնասում են երկու կողմին էլ, եւ չի բացառվում, որ դրանք արդի իրավիճակի քննարկման առարկա դառնան:
«Այդ պատժամիջոցները երկու կողմին էլ հարվածում են ու թանկ արժեն, սակայն, հնարավոր է, դա (դրանց խստացումը) քննարկվի»,- ասել է նա: