Որքանով է Թուրքիան պատրաստ բարելավել հարաբերությունները Հայաստանի հետ ղարաբաղյան հակամարտության հարցում ադրբեջանամետ դիրքորոշման շրջանակում՝ ապագայի հարց է: Այս մասին NEWS.am-ի թղթակցի հետ զրույցում հայտարարեց Ռուսաստանի գիտությունների ակադեմիայի համաշխարհային տնտեսության եւ միջազգային հարաբերությունների ինստիտուտի ավագ գիտաշխատող Վիկտոր Նադեին-Ռաեւսկին՝ մեկնաբանելով օգոստոսի 27-ին Թուրքիայի վարչապետի թեկնածու Ահմեդ Դավութօղլուի ներկայացրած մանիֆեստը, որում կետ կա նաեւ Հայկական հարցի վերաբերյալ:
Ըստ թուրքագետի, սկզբունքորեն Թուրքիայի արտաքին քաղաքական կողմնորոշումը չի տարբերվելու վարչապետի պաշտոնում Ռեջեփ Թայիփ Էրդողանի վարած քաղաքականությունից: «Եվ դա զարմանալի չէ, քանի որ քաղաքական այդ կուրսը հիմնականում ձեւավորվել է Դավութօղլուի հետ համատեղ: Վերջինը միշտ եղել է Էրդողանի բավական հավատարիմ հետեւորդը: Ի տարբերություն այն տարաձայնությունների, որոնք Էրդողանը որոշակի հարցերում ունեցել է նախագահ Գյուլի հետ, Դավութօղլուի հետ նման լուրջ տարաձայնություններ չեն եղել»,- նշեց Վիկտոր Նադեին-Ռաեւսկին:
Նրա խոսքով, Էրդողանը ձգտում է բազմավեկտոր քաղաքականություն վարել. մի կողմից՝ չվատթարացնելով տնտեսական հարաբերությունները Ռուսաստանի հետ, իսկ մյուս կողմից՝ համերաշխություն ցուցաբերելով ՆԱՏՕ-ի արեւմտյան դաշնակիցների նկատմամբ: «Այսինքն՝ նույն ուղեգծով էլ հետագայում կառուցվելու է թուրքական արտաքին քաղաքականությունը»,- հայտարարեց թուրքագետը:
Հիշեցնենք, որ Դավութօղլուի մանիֆեստում արտաքին քաղաքականության հատվածում մի քանի տողով հիշատակվում են միայն Հայկական եւ Կիպրական հարցերը: «Թուրքիայի արտաքին քաղաքականության ամբողջ օրակարգը բաղկացած է Հայկական հարցից եւ Կիպրոսի հարցից: Մենք երբեք չենք հրաժարվի մեր հիմնական սկզբունքներից»,- հայտարարել է Դավութօղլուն: