«ALS Ice Bucket Challenge» բարեգործական նախագիծը, որի շրջանակում մարդիկ իրենց վրա ջուր են լցնում, Լու Գերիգի հիվանդության դեմ պայքարի հիմնադրամին 94.3 մլն դոլարի հասույթ է բերել: Այս մասին գրում է «NBC»-ն:

Գումարը սկսել են հավաքել հուլիսի 29-ից: Անցյալ տարի նույն ժամանակահատվածում հավաքվել էր ընդամենը 2.1 մլն դոլար:

«Մեր հիմնադրամը մեծ թվով հանգանակություններ է ստացել, եւ այժմ մեզ վրա մեծ պատասխանատվություն է դրված»,- հայտարարել է հիմնադրամի նախագահ ու գործադիր տնօրեն Բարբարա Նյուհաուսը:

Ըստ «Gazeta.ru»-ի, նա ասել է, որ կազմակերպությունը մշտապես շփվելու է հիվանդների, դոնորների, լրատվամիջոցների եւ հանրության հետ, որպեսզի գրագետ ներդնի գումարները նախագծերում, որոնք ուղղված են Լու Գերիգի հիվանդության դեմ պայքարին:

Հիշեցնենք, որ Լու Գերիգի հիվանդությունը վնասում է գլխուղեղի շարժողական կենտրոնները եւ հանգեցնում կաթվածի: