2014թ. 1-ին կիսամյակում Հայաստանում գրանցվել է 1370 ճանապարհատրանսպորտային պատահար: Այս մասին օգոստոսի 29-ի մամուլի ասուլիսում հայտնել է ՃՈ ճանապարհապարեկային ծառայության բաժնի պետ Նորիկ Սարգսյանը:
Ըստ նրա՝ նշված ժամանակահատվածում Հայաստանի ճանապարհներին զոհվել է 133 մարդ, վիրավորվել՝ 1925-ը: Նախորդ տարվա նույն ժամանակահատվածի համեմատ 149-ով աճել է պատահարների, 178-ով՝ վիրավորների թիվը:
Միաժամանակ 10-ով կրճատվել է զոհերի թիվը: Կրճատվել է նաեւ ծանր պատահարների թիվը, ինչը, Նորիկ Սարգսյանի խոսքով, դրական արդյունք է:
ՃՈ ներկայացուցիչը նաեւ նշել է, որ հանրապետություն օգոստոսի 29-ի դրությամբ բերվել է 22 հազար մեքենա, ինչը հավասար է նախորդ ամբողջ տարվա ընթացքում բերված մեքենաների թվին:
Նորիկ Սարգսյանը նշել է, որ վրաերթերը նախկինի պես կազմում են պատահարների մոտ մեկ երրորդը, ընդ որում՝ նախկինի պես հիմնականում մեղավորը հետիոտնն է: Սարգսյանի խոսքով՝ հետիոտնի մեղքն ապացուցվելու դեպքում վարորդներն ազատվում են պատասխանատվությունից: