Ուկրաինայի նախագահ Պյոտր Պորոշենկոն սեպտեմբերի 18-ին կայցելի ԱՄՆ, հայտնում է ԻՏԱՌ-ՏԱՍՍ-ը՝ վկայակոչելով Սպիտակ տան մամուլի ծառայությունը:
«Նախագահ Օբաման Ուկրաինայի նախագահ Պյոտր Պորոշենկոյին Սպիտակ տանը կընդունի սեպտեմբերի 18-ին», — ասված է պետության ղեկավարի մամուլի քարտուղար Ջոշ Էռնեստի հաղորդագրությունում:
Ըստ նրա՝ այցը ցույց կտա Վաշինգտոնի աջակցությունը Ուկրաինային՝ վերջինիս ժողովրդավարության, անկախության եւ կայունության» ձգտումների հարցում:
Հանդիպմանը Օբաման մտադիր է գործընկերոջ հետ քննարկել Ուկրաինայի հարավ-արեւելքում ճգնաժամի կարգավորման դիվանագիտական ուղիները, ինչպես նաեւ երկրի ինքնիշխանությանն ու տարածքային ամբողջականությանն ուղղված ջանքերի սատարումը:
ԱՄՆ-ի նախագահն ավելի վաղ հայտարարել էր, որ Ռուսաստանը պատասխանատու է Ուկրաինայում ճգնաժամի թեժացման համար, բայց ԱՄՆ-ն չի նախատեսում ռազմական գործողությունների դիմել ուկրաինական խնդրի լուծման հարցում, եւ Ռուսաստանի հետ զինված հակամարտությունը չի դիտարկվում:
