Ուկրաինան պետք է նստի բանակցությունների սեղանի շուրջ, բայց Կիեւի իշխանությունները խոսում են վերջնագրերի լեզվով, հասկանալի է՝ ինչու ապստամբները դրան պատրաստ չեն: Այս մասին հայտարարել է Ռուսաստանի նախագահ Վլադիմիր Պուտինը՝ հանդես գալով «Սելիգեր-2014» երիտասարդական ֆորումի ժամանակ:
«Մենք բազմիցս խոսել ենք Ուկրաինայի ղեկավարության, ԱՄՆ-ի, եվրոպական երկրների հետ: Պետք է անհապաղ դադարեցնել եղբայրասպան պատերազմը եւ նստել բանակցությունների սեղանի շուրջ: Ի՞նչ է առաջարկել Ուկրաինայի ղեկավարությունը 3-4 շաբաթ առաջ. Միակողմանիորեն (շատ գեղեցիկ է հնչում) դադարեցրեցին ռազմական գործողությունները, բայց անմիջապես ասացին՝ 7 օր, որից հետո, ով վայր չի դրել զենքը, կոչնչացվի: Միթե դա բանակցությունների ճանապարհ է: Դա վերջնագիր է»,-հայտարարել է ՌԴ նախագահը:
«Բնականաբար, մարդիկ, որոնք զենք են վերցրել, իսկ նրանք դա արել են, որպեսզի պաշտպանեն իրենց, իրենց կյանքը, արժանապատվությունը, այդ պայմաններին չեն համաձայնել»,-ընդգծել է Պուտինը, հաղորդում է «ՌԻԱ Նովոստին»:
Նրա խոսքով՝ պետք է ստիպել Կիեւի իշխանություններին ըստ էության խոսել ռուսամետ ակտիվիստների հետ:
