Քալիֆորնիայի Սենատի կողմից ԼՂՀ անկախության ճանաչումը ադրբեջանական ռազմական արկածախնդրության պատասխանն էր, օգոստոսի 29-ին մամուլի ասուլիսում հայտարարել է Միջազգային եւ անվտանգության հարցերի հայկական ինստիտուտի ղեկավար, քաղաքական վերլուծաբան Ստեփան Սաֆարյանը:
Ադրբեջանի ռազմական արկածախնդրությունը, ըստ նրա, վտանգում էր հենց Արեւմուտքի ծրագրերը: «Այսինքն՝ Քալիֆորնիայի Սենատի կողմից ԼՂՀ-ի անկախության ճանաչումը կարելի է որոշակի պատասխան քայլ համարել Ադրբեջանի նկատմամբ», - նշել է Ստեփան Սաֆարյանը, հիշեցնելով, որ արկածախնդրությունը տեղի է ունեցել Արեւմուտքի եւ Ադրբեջանի միջեւ լարվածության ուժեղացման պայմաններում:
Նա հավելել է, որ Ռուսաստանի համար ձեռնտու էր այն, ինչ արեց Ադրբեջանը: «Մոսկվայի կողմից զենք վաճառելը Բաքուն ընդունել է որպես Ռուսաստանի հետ Հայաստանի հարաբերությունների վատթարացման արդյունք, լուռ համաձայնություն՝ այդ զենքը Հայաստանի դեմ օգտագործելու հարցում: Ռուսաստանին այդ արկածախնդրությունն անհրաժեշտ էր՝ Արեւմուտքին ցույց տալու, որ Հայաստանը եւ Ադրբեջանը գտնվում են ռուսական ազդեցության գոտում», - ընդգծել է Ստեփան Սաֆարյանը: Շփման գծում Ադրբեջանի վերջին արկածախնդրությունը, ըստ վերլուծաբանի, շանտաժ էր նաեւ Արեւմուտքին: «Ալիեւը հատեց Ռուբիկոնը, որի համար պատասխան հարվածներ է ստանում: Հետօգոստոսյան իրադարձությունները ցույց տվեցին. Արեւմուտքը Ալիեւին հասկացնում է, որ վերջինս մոտ է սեփական իշխանությունը կորցնելուն», - կարծում է Ստեփան Սաֆարյանը:
