Ադրբեջանցի օլիգարխ Հաֆիզ Մամեդովի թիկնապահները կրկին աչքի են ընկել իրենց պահվածքով: Նրանք առեւանգել եւ ամբողջ գիշերը տանջանքների են ենթարկել տաքսու վարորդին: Այս մասին «haqqin.az»-ին հաղորդել են տուժածի հարազատները: Տեղեկությունների համաձայն՝ 1967թ. ծնված Հարհադ Ալիեւին առեւանգել են Հաֆիզ Մամեդովի մարդիկ օգոստոսի 24-ին: Նրան ուժով դուրս են հանել սեփական ավտոմեքենայից, մեկ այլ մեքենա նստեցրել ու տարել անհայտ ուղղությամբ: Մի քանի հոգի մինչեւ առավոտ տանջել են վարորդին:
Տուժածին տեղափոխել են հիվանդանոց: Իրեն այցելած լրագրողներին Ֆարհադը պատմել է, որ չգիտի իր առեւանգման պատճառը, մինչ այդ օրը ոչ ոքի հետ խնդիրներ չի ունեցել:
«Ամեն օր գնում էի Բինաղադի՝ կնոջս հետեւից: Այդպես էլ օգոստոսի 24-ին: Ճանապարհին նկատեցի, որ «Nissan» մակնիշի ինչ-որ մեքենա է հետեւում: Զիջեցի ճանապարհը, բայց այն անմիջապես իմ մեքենային էր հետեւում: Շուտով վազանց կատարեցին, փակեցին ճանապարհը: Մեքենայից երկու երիտասարդ դուրս եկան ու դանակով սպառնալով՝ դուրս հանեցին ինձ մեքենայից, մեկ ուրիշ մեքենա նստեցրին: Արդեն մեքենայի սրահում սկսեցին հարվածել, հետո գլխիս պարկ հագցրեցին ու տարան անհայտ ուղղությամբ»,- պատմել է տղամարդը:
Ֆարհադ Ալիեւի խոսքով՝ իրեն մութ վայրում էին պահում: «Հանեցին պարկն ու ստիպեցին հագուստս հանել: Այնտեղ 5 հոգի կար, ովքեր ձեռքերս կապեցին: Հետո սկսեցին ծեծել: Մեկը բեյսբոլի մահակով էր հարվածում: Դեմքս ամբողջությամբ ծեծված էր: Զրույցներից հասկացա, որ ինչ-որ «Հաֆկիի» մարդիկ են, անունները՝ Էմիլ, Ալի, Ռամալ եւ Միկի»,- նշել է նա:
Տուժողը պատմում է, որ ծեծի ենթարկելուց հետո իրեն բջջային հեռախոսներով նկարահանել են: Հանցագործները պահանջել են հաղորդել ինչ-որ արկղերի գտնվելու վայրի մասին: Վարորդն ի վերջո խոստովանել է արկղերի անհետացումը: Առավոտյան նրան տարել են Մուհամեդի գյուղի մերձակայք: Նա տեղի բնակիչներից խնդրել է ոստիկանություն կանչել, սակայն ինչ-որ բանից վախենալով՝ չեն կանչել:
«Հետո տաքսի գտա, որն ինձ Բինաղադի տարավ: Կինս ու հարազատներս դիմավորեցին, տեղափոխեցին հիվանդանոց: Ոստիկաններ եկան ու ցուցմունք վերցրեցին: Պատմեցի կատարվածի մասին: Առեւանգումը գրանցել են նաեւ տեսահսկման տեսախցիկները»,- ասել է նա: «Ոստիկանները հայտնեցին, որ դա կազմակերպված հանցավոր խումբ է եւ խոստացան գտնել բոլոր անդամներին»,- պատմել է տուժողը: Ձերբակալվածներ դեռեւս չկան: