Դերասան Վարդան Պետրոսյանի մասնակցությամբ ողբերգական վթարից հետո «Նաիրի» բժշկական կենտրոնում բժիշկ Համազասպ Գեւորգյանը ալկոմետրով արտաշնչած օդի քանակությամբ որոշել է, որ Վարդան Պետրոսյանը սթափ է: Այս մասին մասին այսօր՝ օգոստոսի 29-ին, Կոտայքի մարզի ընդհանուր իրավասության դատարանում հայտնեց վկա, բժիշկ Համազասպ Գեւորգյանը:
«Ես Վարդան Պետրոսյանին տեսել եմ 2-5 րոպե։ Նա պառկած էր պատգարակին, բանավոր հարցրել եմ ՝ խմած է, թե ոչ, ասել է՝ ոչ: Հետո ալկոմետրով ստուգել ենք խմածությունը: Այդ սարքն ունի մուշտուկ, որը փչել է, ցույց է տվել 0 թիվը, գրանցել ենք, որ նա սթափ է: Նրա վիճակը ծանր էր, ճնշումն ընկել էր, պառկած էր սիստեմայի տակ, ուներ շնչառական խնդիրներ, հնարավոր է ՝ փչած օդը բավարար չլիներ ստուգելու համար, որքան կարողացել ենք, ստուգել ենք»,- ասաց վկան՝ նշելով, որ Վարդան Պետրոսյանի հագուստից ալկոհոլի հոտ չի առել:
Հայցվոր կողմի փաստաբան Ռուբեն Բալոյանը հարցեր ուղղեց վկային՝ նրա կազմած խմածության արձանագրության եւ դրա կրկնօրինակի վերաբերյալ: Դերասանի պաշտպան Նիկոլայ Բաղդասարյանն առարկում էր հարցերին, ընդհատում էր՝ ասելով, որ հարցերը կրկնվում են: Նիկոլայ Բաղդասարյանը վիճեց նաեւ դատավոր Վաղինակ Մկրտչյանի հետ, որը պաշտպանի նկատմամբ դատական սանկցիա՝ նախազգուշացում կիրառեց:
Ռուբեն Բալոյանը նշեց, որ դեպքի օրը բժշկի կազմած արձանագրության մեջ եւ դեպքից ամիսներ հետո Նիկոլայ Բաղդասարյանի հարցմամբ տրված կրկնօրինակում բժշկի ստորագրությունները տարբեր են:
Բժիշկն ասաց, որ երկու տեղում էլ իր ստորագրություններն են, պարզապես հերթապահությունից հոգնած է եղել, այդ պատճառով հնարավոր է՝ մի փոքր տարբեր են ստացվել:
Դատական նիստը շարունակվում է:
Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է կայանած «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ էդվարդ եւ էդգար Հայկի Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթեւեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։