Ահմեդ Դավութօղլուի՝ Թուրքիայի վարչապետ նշանակվելը ոչ մի փոփոխություն չի մտցնի հայ-թուրքական հարաբերությունների մեջ, որովհետեւ Ադրբեջանն է փաստացի որոշում Թուրքիայի վերաբերմունքը Հայաստանի նկատմամբ: NEWS.am-ի հետ զրույցում Թուրքիայում ձեւավորված նոր կառավարության մասին նման կարծիք հայտնեց Ստամբուլի հայկական «Ակոս» պարբերականի հայերեն էջերի խմբագիր Բագրատ Էստուկյանը:
«Դեռ վաղ է խոսել, թե ինչպես կանդրադառնա նոր կառավարությունը հայ-թուրքական հարաբերությունների վրա, սակայն ես հույս չունեմ, որ ինչ-որ բան կփոխվի, որովհետեւ տակավին նախկին արտգործնախարարը Դավութօղլուն այժմ վարչապետ է, հետեւաբար, ներկայիս արտգործնախարարը՝ Մեւլյութ Չավուշօղլունը, կանի այն, ինչ վարչապետը կասի: Մեծ ակնկալություններ չունի նաեւ հայկական համայնքը, քանի որ մեծ հաշվով բան չի փոխվել»,- ասաց նա:
Էստուկյանի կարծիքով՝ նույնիսկ վարչապետի եւ նախագահի փոփոխությունը հայ-թուրքական հարաբերությունների վրա չի ազդի. «Հայաստանի եւ Թուրքիայի հարաբերությունների վրա կարող է ազդել միայն Ադրբեջանը. Նա է որոշում, թե Թուրքիան ինչպես վերաբերվի Հայաստանին, քանի որ իր ձեռքին ունի նավթի խաղաթղթերը»:
Նշենք, որ օգոստոսի 10-ին կայացած նախագահական ընտրություններին հաղթել էր Ռեջեփ Թայիփ Էրդողանը, որն էլ օգոստոսի 28-ին երդում էր տվել խորհրդարանում: Թուրքիայի վարչապետ է նշանակվել Ահմեդ Դավութօղլուն: Նրան արտգործնախարարի պաշտոնում կփոխարինի Եվրոպայի գործերով նախարար Մեւլյութ Չավուշօղլուն: