ՀՀ ՊՆ N զորամասի մարտական դիրքերից մեկում օգոստոսի 28-ին գլխի ճակատային շրջանում ստացած հրազենային վնասվածքից մահացած ժամկետային զինծառայող Վլադիմիր Հայրապետյանը Երեւանից էր, դեպքի օրը պետք է իջներ մարտական դիրքերից եւ 7 օրով արձակուրդ գար: Վլադիմիրի մայրը՝ տիկին Սիրանույշը, NEWS.am-ի հետ զրույցում ասաց, որ որդու հետ հենց դեպքի օրն էր խոսել:
«Սիսիանում էր ծառայում: Ծառայությունից գոհ էր, հաճախ էինք խոսում: Ցերեկը զանգեց, հավեսով խոսեց, տրամադրությունը լավ էր: Գիշերը 10-ին ինձ ասացին դեպքի մասին: Սկզբում ասում էին՝ թե երեխեն տնեցիների հետ խոսացել է, իրեն վատ է զգացել, խփել է ինքն իրեն: Հետո էլ ասեցին՝ ընկերն է խփել էրեխուն: Բայց ինձ ասեցին, որ իրականում սնայպերն է խփել էրեխուն»,- ասաց տիկին Սիրանույշը:
Մայրը բացառում է որդու ինքնասպանության վարկածը, ոչ էլ հավատում է, թե հնարավոր է՝ որդին ընկերների հետ կռված լիներ:
«Ես ասեցի, որ վերջինն իմ հետ է խոսել, ինչ տեսակի խոսակցություն է եղել, բացի այդ իմ էրեխեն էդքան հավասարակշռված, էդքան պարապած տղա, ո՞նց իրեն կխփեր: Այն դեպքում, որ գիտեր, որ 10 ամիս էր մնացել։ Վայրկյաններն էի հաշվում, ասում էի՝ Վալոդիկ, արի, ինձ հասի: Իրանից լավը չկար թե բնավորությամբ, թե հասկացողությամբ»,- ասաց տիկին Սիրանույշը:
Վլադիմիրը մոր հետ էր ապրում, ունի ավագ եղբայր: Մինչեւ բանակ զորակոչվելը սպորտով է զգաղվել՝ կարատե է պարապել, վերադառնալուց հետո էլ պատրաստվում էր շարունակել այն:
«Վլադը շատ խելոք երեխա էր, փոքրուց մեր աչքի դեմը մեծացած, բոլորս ցավ ենք ապրում, որ տենց դեպք է եղել: Ոչ մի անշնորհք բան ոչ մեկ էդ երեխուց չի տեսել, արտակարգ երեխա էր»,-NEWS.am-ին ասաց հարեւանուհիներից Սաթենիկ Մովսիսյանը:
Հիշեցնենք, որ դեպքի առթիվ հարուցվել է քրեական գործ՝ ՀՀ քրեական օրենսգրքի 365 հոդվածի 3-րդ մասի հատկանիշներով (մարտական հերթապահություն կամ մարտական ծառայություն կրելու կանոնները խախտելը, որն առաջացրել է ծանր հետեւանքներ): Կատարվում է նախաքննություն։
