Հայաստանի երկրորդ նախագահ Ռոբերտ Քոչարյանի հարցազրույցում հիմնականում նոր շեշտադրումներ չկային: Այս մասին օգոստոսի 29-ին ՀՀԿ գործադիր մարմնի նիստից հետո լրագրողներին հայտարարեց կուսակցության մամուլի խոսնակ, Հայաստանի խորհրդարանի փոխնախագահ Էդուարդ Շարմազանովը:
«Ես ծանոթ եմ երկրորդ նախագահի հարցազրույցին եւ կարող եմ ասել, որ ոչ մի նոր շեշտադրում չկար: Դա հերթական հարցազրույցն էր եւ չեմ կարծում, որ այն մեկնաբանելու կարիք կա»,- հավելեց Շարմազանովը:
Հարցին՝ ինչպես է գնահատում Քոչարյանի քննադատության խորությունը, Շարմազանովը պատասխանեց. «Ես չասացի, որ Քոչարյանի արտահայտությունները հենց այնպես են արվել: Պարզապես չի ասվել մի բան, որի մասին նախկինում չի խոսվել: Իսկ եթե հարցնում եք, արդյո՞ք ես կիսում եմ այդ դիրքորոշումը, ապա ես կիսում եմ իմ կուսակցության դիրքորոշումը: Եվ դուք անընդհատ ծանոթանում եք դրան»,- հավելեց Շարմազանովը:
Նշենք, որ Ռուսաստանի հայկական պարբերականներից մեկին՝ «Նոյան տապան»-ին («Ноев Ковчег») տված հարցազրույցում Ռոբերտ Քոչարյանը հայտարարել էր, որ ինքն առայժմ որեւէ ներքին կամ արտաքին պատճառ չի տեսնում Հայաստանի տնտեսության շուրջ լավատեսության համար:
«Ի հայտ են եկել նոր՝ գլոբալ բնույթի սպառնալիքներ, որոնց ազդեցության աստիճանը դեռեւս պետք է գնահատել: Ինչպես կազդեն Արեւմուտքի եւ Ռուսաստանի փոխադարձ պատժամիջոցները գլոբալ տնտեսության վրա, ինչպես կարձագանքի պատժամիջոցներին ռուսական տնտեսությունը, որքան ժամանակ այդ կտեւի, արդյոք պատժամիջոցները կաճեն եւ այլն»,- նշել էր Քոչարյանը՝ հավելելով, որ այս հարցերին պատասխան չկա, նշանակում է՝ Հայաստանը մուտք է գործել բացասական սպասելիքների գոտի:
