Թուրքիայի նախագահ Ռեջեփ Թայիփ Էրդողանի ցանկացած որոշման դեպքում Հայաստանը շահեկան վիճակում կհայտնվի: Այս մասին օգոստոսի 29-ին լրագրողներին հայտարարեց Հայաստանի Հանրապետական կուսակցության մամուլի քարտուղար, խորհրդարանի փոխխոսնակ Էդուարդ Շարմազանովը՝ մեկնաբանելով Հայաստան այցի պաշտոնական հրավերը, որն Էրդողանի երդմնակալության ժամանակ նրան փոխանցել է Հայաստանի ԱԳ նախարար Էդվարդ Նալբանդյանը: Հայաստանի նախագահ Սերժ Սարգսյանը պաշտոնապես Էդրողանին հրավիրել է հաջորդ տարի ապրիլի 24-ին մասնակցել Հայոց ցեղասպանության զոհերի հիշատակին նվիրված արարողությանը:
«Ես կիսում եմ փորձագետների կարծիքը, որի համաձայն՝ նախարար Նալբանդյանի այցը եւ հայկական իշխանությունների որոշումն արդարացված են: Առաջին հերթին, հրավեր ուղարկելով եւ փոխանցելով այն հենց Անկարայում՝ Հայաստանի իշխանությունները դարձյալ հաստատում են, որ շարունակում են պայքարել Ցեղասպանության ժխտման դեմ: Եվ Հայաստանի Հանրապետությունը ցույց է տալիս, որ Թուրքիայից ակնկալում է դեմ առ դեմ դուրս գալ պատմությանը: Չեմ ցանկանում խոսել պայմանական լարման մասին, սակայն եթե Էրդողանը գա, կնշանակի, որ Թուրքիայի իշխանություններն ընդունում են մարդկության դեմ հանցագործությունը եւ վերջ են դնում ժխտմանը: Իհարկե, դեռեւս այդ մասին վկայող ազդանշան չեմ տեսնում: Եթե Էրդողանը հրաժարվի Հայաստան գալ ու Ծիծեռնակաբերդ այցելել, կնշանակի, որ Անկարայի ժխտողական քաղաքականությունը շարունակվում է»,- հավելեց նա:
Երկու որոշումն էլ, ըստ Շարմազանովի, Հայաստանին քարտ-բլանշ են տալիս միանգամայն համարժեք եւ արդարացված գործողությունների համար: