Արագածոտնի մարզի Թալին քաղաքի հիվանդանոցում աշխատող 41-ամյա սիրիահայ սրտաբան Բողոս Աղոյանը, ում օգոստոսի 20-ին հիվանդանոցի բակում Թալինի քաղաքապետի բարեկամները ծեծի էին ենթարկել, ոստիկանությունից հետ է վերցրել բողոքը: Այս մասին այսօր՝ օգոստոսի 29-ին, NEWS.am-ի թղթակցի հետ զրույցում հայտնեց Բողոս Աղոյանը:
«Իրենք երեքով՝ քաղաքապետի եղբայրը, վարորդը՝ Կայծը, քաղաքապետի բարեկամը՝ Սուրիկ Գրիգորյանը, եկան եւ անձամբ ներողություն խնդրեցին ինձնից: Մենք հաշտվել ենք, հաշտության պայմանագիր ենք կնքել: Իրենք ընդունել են իրենց մեղքը, կարծում եմ՝ նման բան այլեւս չի լինի, ու իմաստ չկա շարունակել թշնամությունը. ես Թալինում եմ ապրում ու աշխատում, կինս էլ թալինցի է: Այնպես որ՝ ես դիմումս հետ եմ վերցրել ոստիկանությունից»,- հայտարարեց բժիշկը:
Հիշեցնենք, որ Արագածոտնի մարզի Թալին քաղաքի հիվանդանոցում աշխատող 41-ամյա սիրիահայ սրտաբան Բողոս Աղոյանն օգոստոսի 20-ին մեքենայի կայանման պատճառով վիճաբանություն էր սկսել Թալինի քաղաքապետի բարեկամների հետ: Վերջինները բժշկին հայհոյել էին եւ ծեծի ենթարկել: Բողոս Աղոյանը դեպքի առիթով հաղորդում էր տվել ոստիկանություն: