Վարչապետ Հովիկ Աբրահամյանի հանձնարարությամբ համապատասխան գերատեսչությունների ներկայացուցիչներից աշխատանքային խումբ է ձեւավորվում՝ սահմանամերձ համայնքներին աջակցության նպատակով բոլոր գաղափարներն ու առաջարկությունները գույքագրելու եւ հարցերի լուծման հետ կապված մոտեցումները Կառավարությանը ներկայացնելու համար: Այս մասին ՀՀ փոխվարչապետ, տարածքային կառավարման նախարար Արմեն Գեւորգյանն ասել է Հայկական երկրորդ հեռուստաալիքի «Խոսքի իրավունք» հաղորդաշարին տված հարցազրույցում:
Ըստ նրա, կառավարությունն արդեն որոշ քայլեր ձեռնարկել էր, մասնավորապես` հողի հարկի եւ ոռոգման ջրի վարձավճարների փոխհատուցման մասով, որոնք, իհարկե, բավարար չեն բնակիչներին հուզող խնդիրները լուծված համարելու համար: «Վարչապետն արդեն հայտարարել է, որ մշակվում են օրենսդրական հիմքեր՝ սահմանամերձ համայնքներում գործարարությամբ զբաղվելու ավելի բարենպաստ պայմաններ ստեղծելու առումով, մասնավորապես` խոսքն այդ տարածքներում գործարարությամբ զբաղվող անհատներին կամ սուբյեկտներին որոշ հարկատեսակներից ազատելու մասին է»,- նշել է փոխվարչապետը:
«Բացի այդ, առաջիկայում Ազգային ժողովի մեր գործընկերների հետ մի քանի, մասնավորապես` կրթության ոլորտում աջակցության, առողջապահության ոլորտում առավել մատչելի հնարավորությունների ստեղծման, կոմունալ-կենցաղային ծառայությունների եւ այլ ուղղություններով առաջարկություններ կմշակենք»,- տեղեկացրել է Արմեն Գեւորգյանը՝ հավելելով, որ սահմանամերձ համայնքների առօրյա խնդիրները մշտապես եղել են իշխանությունների ուշադրության կենտրոնում: