Արամ Խաչատրյանի անվան մեծ համերգասրահում՝ ՀՀ սփյուռքի նախարարության, ՀՀ մշակույթի նախարարության աջակցությամբ եւ ՀԲԸՄ հովանավորությամբ, օգոստոսի 29-ին կայացել է «Երգում է 70-ականների Երեւանը եւ Հալեպը» խորագրով բարեգործական համերգ, որից ստացված ողջ հասույթը կուղղվի սիրիահայերի կարիքների ապահովմանը:
Համերգը վարեցին հանրաճանաչ հաղորդավար Սուսաննա Շահինյանը եւ սիրիահայ երգիչ Ժան Վարդանը:
70-ականների երգերի կատարումներով հանդես եկան Արամոն, Էմմին, Գայանե Հովհաննիսյանը, Ռադիկ Գաբրիելյանը:
Ջազային երաժշության ընտրանի ներկայացրեցին սիրիահայ արվեստագետներ Րենա Տին, Ժան Վարդանը, Լիլա Վարդանյան-Պօղոսեանը, Կարօ Տաղտեվիրենեանը:
Նվագակցում էր «70-ականների Երեւան» նվագախումբը, որի երաժիշտների հիմնական մասը Կոնստանտին Օրբելյանի՝ Հայաստանի պետական էստրադային նվագախմբի անդամներն են:
Համերգին ներկա էին ՀՀ սփյուռքի նախարար Հրանուշ Հակոբյանը, պաշտոնատար անձինք, մտավորականներ, արվեստի գործիչներ, հյուրեր:
Ողջունելով համերգի կազմակերպիչներին, նախարար Հրանուշ Հակոբյանը մասնավորապես նշեց. «Ուզում եմ շնորհակալություն հայտնել այս հրաշալի նախաձեռնության կազմակերպիչներին, հովանավորներին, արտիստներին: Այսօր Հալեպը արյունահոսում է, մեր մայր գաղութը պատերազմի մեջ է: Մենք հավաքվել ենք այստեղ մեր զորակցությունը հայտնելու, օգնելու, աջակցելու մեր սիրիահայ հայրենակիցներին: Նրանք զգում են, որ Հայրենիքն իրենց կողքին է եւ դժվարին պահին մենակ չի թողել: Մենք ուժեղ ենք միասին, եւ միասին պետք է հաղթենք ու զորանանք: Մենք կանք, կլինենք ու կշատանանք»:
Հայաստանցի եւ սիրիահայ սիրված երգիչների մասնակցությամբ համերգը Հայաստանում սիրիահայերի ինտեգրման հերթական քայլն է եւ ապացույցը, որ մշակույթն ազգի համախմբան կարեւորագույն միջոցներից է:
Համերգն ավարտվեց «Զարթնի՛ր լաո» երգի միասնական կատարումով: Երաժիշտներին ոտնկայս ձայնակցում էր ողջ դահլիճը:
