Ամերիկացիներն ու եվրոպացիներն աստիճանաբար սկսում են հասկանալ, թե ով է իրականում մեղավոր, ով է խախտում հրադադարի ռեժիմը ղարաբաղյան հակամարտության շփման գծում: Այդ մասին NEWS.am-ի թղթակցի հետ զրույցում պատմեց Ամերիկայի Հայ Դատի Գրասենյակի գործադիր տնօրեն Արամ Համբարյանը:
«Չգիտեմ, թե ինչի մասին է մտածում Իլհամ Ալիեւը. նա բազմիցս հայտարարել է, որ մտադիր է պատերազմել, չգիտեմ, թե ինչի կհանգեցնեն նրա խոսքերը: Մենք հիասթափված ենք, որ ԱՄՆ-ն ու ԵԱՀԿ-ն պահպանում են կեղծ չեզոքությունը՝ կոչ անելով երկու կողմին վերջ տալ հրադադարի ռեժիմը: Մենք փորձում ենք փոխել այդ մոտեցումը, որպեսզի այն դեպքերում,երբ Ադրբեջանը խախտում է համաձայնությունները, նրանք հայտարարեն այդ մասին: Երբ նրանք դա չեն անում, Ադրբեջանը շարունակում է խախտել համաձայնությունը, դա վտանգավոր է»,- ընդգծել է Արամ Համբարյանը: Միաժամանակ նա վստահություն է հայտնել, որ կողմերը կարող են լուծել ղարաբաղյան խնդիրը բանակցությունների շուրջ: «Միջնորդներն աստիճանաբար խախտում են «չեզոքությունը», ինչպես որ, օրինակ, տեղի ունեցավ Ադրբեջանում գերության մեջ Կարեն Պետրոսյանի մահվան դեպքում»,- եզրափակեց Արամ Համբարյանը:
Հիշեցնենք, որ Ֆրանսիայի, ԱՄՆ-ի եւ Ռուսաստանի արտգործնախարարությունները հանդես են եկել հայտարարություններով՝ անհանգստություն հայտնելով Կարեն Պետրոսյանի մահվան կապակցությամբ:
Հայաստանի Տավուշի մարզի Չինարի գյուղի բնակիչ Կարեն Պետրոսյանն օգոստոսի 7-ին գերի էր ընկել: Օգոստոսի 8-ին ադրբեջանական կողմը հաղորդագրություն տարածեց գերու մահվան մասին՝ «սրտային անբավարարության» հետեւանքով: