Իրանի դեմ ԱՄՆ-ի նոր պատժամիջոցները բացասական ազդեցություն կունենան Իսլամական Հանրապետության եւ իրանական ատոմային ծրագրի կարգավորման հարցերով միջազգային միջնորդների միջեւ կայանալիք առաջիկա բանակցությունների ընթացքի վրա, IRNA գործակալությանը հայտարարել է ԻԻՀ-ի ԱԳՆ-ի պաշտոնական ներկայացուցիչը:
«Այդ գործողությունները ատոմային բանակցությունների ընթացիկ գործընթացների հետ անհամատեղել են: Եթե Իրանի Իսլամական Հանրապետությունը, ձեռքբերված պայմանավորվածությունների համապատասխան, վստահության ամրապնդմանն ուղղված քայլեր է ձեռնարկել, ապա ակնկալում է, որ մյուս կողմերի ներկայացուցիչները նույնպես ճիշտ այդպես պետք է գործեն», - հայտարարել է ԱԳՆ-ի պաշտոնական ներկայացուցիչը:
Ուրբաթ հայտնի է դարձել, որ ամերիկյան իշխանությունները նոր պատժամիջոցներ են սահմանել 25 ֆիզիկական անձանց եւ կազմակերպությունների դեմ, այդ թվում՝ իրանական ատոմային ծրագրին օժանդակելու մեջ կասկածվող տրանսպորտային ընկերություններ, ավիաընկերությունները եւ 6 բանկ: Վաշինգթոնը հայտարարել էր, որ նոր պատժամիջոցների ցուցակում հայտնվածները խախտել են Իրանի նկատմամբ գործող սահմանափակումները, հաղորդում է «ՌԻԱ Նովոստին»:
Մեկնաբանելով ԱՄՆ-ի կողմից իրանական մի շարք ձեռնարկությունների դեմ սահմանված նոր պատժամիջոցները՝ Ռոհանին հայտարարել է, որ իր վարչակազմը «նոր պատժամիջոցների հետեւանքերի հաղթահարման ճանապարհին մտադիր չէ կորցնել եւ ոչ մի րոպե»:
ԱՄՆ-ն, Իսրայելը եւ Արեւմուտքի մի շարք երկրներ Իրանին մեղադրում են ատոմային զենքի մշակման փորձերի մեջ: Թեհրանը բոլոր մեղադրանքները հերքում է՝ հայտարարելով, որ իր ատոմային ծրագիրն ուղղված է բացառապես երկրի՝ էլեկտրաէներգիայի նկատմամբ պահանջարկի բավարարմանը: