Ոչ միայն Հայաստանն ու Ադրբեջանը, այլեւ ցանկացած ժողովրդական երկիր եւ անհատ պետք է աշխատի այն ուղղությամբ, որ մարդիկ չմահանան միայն այն բանի համար, որ որոշել են ապրել ազատ: Այս մասին այսօր` օգոստոսի 30-ին, Հայոց ցեղասպանության թանգարան այցելության ժամանակ ասաց Լիտվայի Հանրապետության սեյմասի (խորհրդարանի) պատգամավոր, Լեռնային Ղարաբաղի Հանրապետության հետ Լիտվայի սեյմասի բարեկամության խմբի նախագահ Դալիա Կուոդիտեն՝ պատասխանելով NEWS.am-ի հարցին` արդյոք Արեւմուտքի արձագանքը համաչափ էր վերջին շրջանում ղարաբաղա-ադրբեջանական շփման գծում լարվածությանը եւ բավարար Ադրբեջանի կողմից հետագա ագրեսիան կանխելու համար:
«Ես դեմ եմ պատերազմին։ Մենք այսօր խոսեցինք ձեր նախագահի հետ եւ պարզեցինք, որ մեր դիրքորոշումներն այս հարցում համընկնում են: Նա վերահաստատեց, որ Հայաստանը կողմ է միայն հակամարտության խաղաղ ճանապարհով լուծմանը: Արցախի ժողովուրդը պետք է ապրի խաղաղ: Ես կարծում եմ, որ ոչ միայն Հայաստանն ու Ադրբեջանը, այլեւ ցանկացած ժողովրդական երկիր պետք է աշխատի այն ուղղությամբ , որ մարդիկ չմահանան միայն այն բանի համար, որ որոշել են ապրել ազատ»,- ասաց Դալիա Կուոդիտեն:
Նրա խոսքով` հենց այդ ուղղությամբ է աշխատում Արցախ-Լիտվա բաերկամության խումբը:
Դալիա Կուոդիտեն նշեց, որ սեպտեմբերի 1-ին իրենց պատվիրակությունը կայցելի Արցախ, որտեղ կքննարկվեն հետագա համագործակցության ծրագրերը:
Հարցին, թե Արցախ այցելությունից հետո չի վախենում հայտնվել Ադրբեջանի տխրահռչակ սեւ ցուցակում, Դալիա Կուոդիտեն պատասխանեց. «Ես վախենալու բան չունեմ, դա իմ խնդիրը չէ, դա Ադրբեջանի իշխանությունների իրավունքն է»:
Դալիա Կոուդիտեն շնորհավորեց նախագահ Սերժ Սարգսյանին օգոստոսի 28-ին ԱՄՆ Կալիֆոռնիա նահանգի սենատի կողմից ԼՂՀ անկախությունը ճանաչելու կապակցությամբ:
Հարցին, թե երբ է հնարավոր Լիտվայի կողմից Լեռնային Ղարաբաղի անկախության ճանաչումը, պատգամավորն ասաց. «Հնարավոր է՝ թեկուզ ոչ վաղը, դրա համար խիզախություն է պետք, բայց պետք չէ շտապեցնել իրադարձությունները, ամեն ինչ պետք է անել քայլ առ քայլ: Ամենակարեւոր սկզբունքները, որ պետք է լինեն այս խնդրի լուծման հիմքում, բռնությունը բացառելն է եւ մարդկանց ազատ կամքի դրսեւորումը»:
Նշենք, որ Դալիա Կուոդիտեն իր ղեկավարած պատվիրակության հետ այցելեց Ծիծեռնակաբերդի հուշահամալիր, հարգանքի տուրք մատուցեց 1915թ. Ցեղասպանության զոհերին:
