Սաուդյան Արաբիայի թագավոր Աբդալլահը նախազգուշացրել է, որ մերձավորարեւելյան ահաբեկչությունը շուտով կհասնի Եվրոպա եւ ԱՄՆ, եթե իսլամիստների դեմ անհապաղ միջոցներ չձեռնարկվեն: Այս մասին հաղորդում է Reuters-ը՝ վկայակոչելով սաուդյան գործակալությունները:
Թագավոր Աբդալլահ Բեն Աբդել Ազիզ ալ Սաուդը այս հայտարարությամբ դիմել է օտարերկրյա դեսպաններին, որոնց հետ հանդիպումը կայացել է երեկ՝ օգոստոսի 29-ին:
«Խնդրում եմ այս ուղերձը փոխանցեք ձեր առաջնորդներին… Այս պահին ահաբեկչությունն իրենից չար ուժ է ներկայացնում, որի դեմ անհրաժեշտ է պայքարել արագ եւ խելացի: Եթե դա ուշացվի, ես վստահ եմ, որ մեկ ամսից ահաբեկչությունը կհասնի Եվրոպա, իսկ եւս մեկ ամիս անց՝ մինչեւ Ամերիկա»,-ասել է թագավորը, հաղորդում է «ՌԻԱ նովոստին»:
Նախօրեին Մեծ Բրիտանիայում ահաբեկչության սպառնալիքի մակարդակը բարձրացվել է «զգալի»-ից հասնելով «լուրջ»-ի: Այդ որոշումը կապված է Սիրիայում եւ Իրաքում տիրող իրավիճակի հետ:
