Հազարավոր քաղաքացիներ պահանջում են Վարդան Պետրոսյանի մասնակցությամբ վթարի գործով նոր, անկախ փորձաքննություն նշանակել, ինչը կհաստատի, որ ավտովթարը եղել է փողոցի բանուկ մասում եւ ոչ թե կողնակում: Այս մասին այսօր՝ օգոստոսի 30-ին, NEWS.am-ի հետ զրույցում ասաց դերասանի կողմնակիցներից Ալինա Նիկողոսյանը՝ տեղեկացնելով, որ շուրջ 4000 քաղաքացի ստորագրել է այդ պահանջով գրության տակ:
«Ստորագրելու ակտիվությունը բարձր է եղել հասարակության կողմից: : Երբ մարդկանց ներկայացնում ես, որ բացթողումներ են եղել, գիտակից մարդիկ ստորագրում են անկախ փորձաքննության պահանջի տակ: Ստորագրությունը կշարունակվի մինչեւ սեպտեմբերի 5-ը, 12-ը: Մտածում ենք, որ սեպտեմբերից մարդիկ ավելի ակտիվ կլինեն, քանի որ արձակուրդից վերադառնում են»,-ասաց Ալինա Նիկողոսյանը՝ նշելով, որ մի շարք համալսարաններից ստորագրահավաքին միանալու ցանկություն են հայտնել:
Նշենք, որ ստորագրահավաքն անցկացվում է օգոստոսի 7-ից՝ «Մոսկվա» կինոթատրոնի հարեւանությամբ: Այն նաեւ առցանց տարբերակով է անցկացվում, որի վրա վերջերս հաքերային հարձակում է եղել:
«Օնլյան ստորագրահավաքի արդյունքները դեռ չենք հաշվել, բայց հաքերային հարձակումից հետո 200 ստորագրություն պակասել էր»,-ասաց Ալինա Նիկողոսյանը:
Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է կայանած «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ էդվարդ եւ էդգար Հայկի Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթեւեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։