ՀՀ ԶՈւ Գլխավոր շտաբի պետի տեղակալ, գեներալ-լեյտենանտ Հայկազ Բաղմանյանը շարունակում է անդավաճան մնալ իր բարոյական «սկզբունքին»:
NEWS.am-ի թղթակիցը զանգահարել էր գեներալ-լեյտենանտին՝ պարզելու համար, թե ինչ վիճակում է օգոստոսի 28-ին վթարի ենթարկված նրա եղբորորդին՝ Դավիթ Բաղմանյանը: Հարցը մինչեւ վերջ չլսելով՝ Հայկազ Բաղմանյանը բարկացավ, լրագրողին մեղադրեց «նման պայմաններում» նման հարց տալու համար, հայհոյանք տվեց ու անջատեց հեռախոսը:
Նշենք, որ «Էրեբունի» ԲԿ-ում, ուր «Սուրբ Գրիգոր Լուսավորիչ» բժշկական կենտրոնից տեղափոխվել է Դավիթ Բաղմանյանը, հրաժարվեցին որեւէ տեղեկություն տրամադրել հիվանդի վիճակի վերաբերյալ՝ նշելով, որ հարազատներն արգելել են դա անել:
Հիշեցնենք, որ Դավիթ Բաղմանյանը վթարի է ենթարկվել օգոստոսի 28-ին առավոտյան ժամը 08:30-ին. Երեւան քաղաքի Նոր Նորք 5-րդ զանգվածի բնակիչ, 21-ամյա Դավիթ Բաղմանյանը, վարելով «ՎԱԶ 2121» մակնիշի 777 NM 71 համարանիշի ավտոմեքենան, Դավիթ Բեկի թիվ 138 հասցեի դիմաց բախվել է Երեւանի բնակիչ, 54-ամյա Պետրոս Աբգարյանի վարած «ԶԻԼ» մակնիշի 19 OՏ 847 համարանիշի ավտոմեքենային: Դավիթ Բաղմանյանը տեղափոխվել է «Սուրբ Գրիգոր Լուսավորիչ» բժշկական կենտրոն, իսկ այնտեղից էլ «Էրեբունի» բկ:
