Ռուսաստանն օգոստոսի 31-ին ներմուծման մաքսատուրքեր կսահմանի մոլդովական ապրանքների համար: Ըստ «ՌԻԱ Նովոստի»-ի, համապատասխան դրույթները հուլիսի վերջին ստորագրել էր ՌԴ վարչապետ Դմիտրի Մեդվեդեւը:
Այսուհետ մի շարք մթերքներ, ալկոհոլ, ցորեն, շաքար, միս, բանջարեղեն, կահույք եւ այլ ապրանքներ Մոլդովայից մաքսային հարկման կենթարկվեն՝ ազգի առավելագույն բարենպաստման ռեժիմի սկզբունքներին համաձայն: Ցուցակում, ընդհանուր առմամբ, 19 կետ կա:
Մինչ այդ, մոլդովական ապրանքները ներկրման մաքսատուրքի գանձման չէին ենթարկվում, քանի որ այդ երկրի հետ Ռուսաստանն ազատ առեւտրի համաձայնագիր ուներ:
Մոլդովան հունիսի 27-ին Եվրամիության հետ ասոցացման համաձայնագիր կնքեց՝ Ուկրաինայի եւ Վրաստանի հետ նույն օրը: Քիշնեւն արդեն վավերացրել է փաստաթուղթը: ՌԴ առաջին փոխվարչապետ Իգոր Շուվալովը դրանից հետո հայտարարել էր, Մոլդովան կարող է հեռացվել ԱՊՀ ազատ առեւտրի գոտու մասին համաձայնագրից: