Ուկրաինայում Ռուսաստանի գործողությունների կապակցությամբ Հյուսիսատլանտյան դաշինքի մի շարք երկրներ կոչ են արել չեղյալ համարել ՆԱՏՕ-Ռուսաստան հիմնարար ակտը, որը սահմանափակում է զինծառայողների թիվը, որոնք ՆԱՏՕ-ն իրավունք ունի տեղակայել նախկին արեւելյան բլոկի երկրների տարածքում: Այս մասին գրում է գերմանական «Der Spiegel» շաբաթաթերթը՝ վկայակոչելով Գերմանիայի կառավարության եւ Բրյուսելում ՆԱՏՕ-ի շտաբ-բնակարանի աղբյուրներին:
Պարբերականի համաձայն՝ այս տարբերակի կողմնակից են Լեհաստանը, Բալթյան երկրները, ինչպես նաեւ Կանադան: Գերմանիան դեմ է, սակայն այս երկրի դիվանագիտական շրջանակների աղբյուրը «Der Spiegel»-ին տեղեկացրել է, որ «ռուսաստանցիների ամեն նոր ռազմական քայլով Բեռլինի համար ավելի դժվար է դառնում պաշտպանել այս դիրքորոշումը»:
Լյուքսեմբուրգի արտգործնախարար Ժան Ասելբորնը շաբաթաթերթին տված հարցազրույցում նշել է, որ «կապված Ռուսաստանի նոր ագրեսիվ գործողությունների հետ՝ դիվանագիտությունն ավելի պարզ է ցույց տալիս իր սահմանները»: Նրա խոսքով, ըստ «Deutsche Welle»-ի ռուսական ծառայության, հարց է ծագում, հնարավո՞ր է, արդյոք, Ռուսաստանի նախագահ Վլադիմիր Պուտինից ինչ-որ բան ակնկալել բանակցությունների միջոցով: