Ուկրաինայի հարավ-արեւելքում իրավիճակի կարգավորման համար անհրաժեշտ է բովանդակալից բանակցություններ սկսել երկրի հարավ-արեւելքում պետականության եւ հասարակության քաղաքական կազմակերպման հարցերի շուրջ: Այս մասին հայտարարել է Ռուսաստանի նախագահ Վլադիմիր Պուտինը:
«Հարկավոր է ձգտել այն ծրագրի իրականացմանը, որի շուրջ մենք պայմանավորվել ենք: Հարկավոր է անհապաղ անցնել բովանդակային բանակցությունների, եւ ոչ թե տեխնիկական հարցերի, այլ Ուկրաինայի հարավ-արեւելքում պետականության եւ հասարակության քաղաքական կազմակերպման հարցերի շուրջ՝ այնտեղ բնակվող մարդկանց օրինական շահերի ապահովման նպատակով»,- ռուսական Առաջին ալիքի «Կիրակնօրյա ժամանակ» ծրագրին տված հարցազրույցում ասել է Պուտինը:
Միաժամանակ, նախագահն ընդգծել է, որ մարդիկ, ովքեր կարծում են, թե ռուսամետ ակտիվիստները նստած սպասելու են խոստացված բանակցություններին, երբ իրենց աչքի առջեւ «ուղղակի հրամանով ռմբակոծելու են Ուկրաինայի հարավ-արեւելյան քաղաքներն ու գյուղերը», պատրանքների գերին են:
Ինչ վերաբերում է արեւմտյան գործընկերներին, ովքեր Ռուսաստանի դեմ հերթական պատժամիջոցներով են սպառնում, ապա, Պուտինի խոսքով, նրանց հարկավոր է հիշեցնել սեփական իդեալների մասին:
«Այդ դեպքում ինչո՞ւմ են կայանում, այսպես կոչված, եվրոպական արժեքները: Պետական հեղաշրջմանն աջակցություն, զենքի ուժով իշխանության գրավում եւ զինված ուժերի օգնությամբ անհամաձայնության ճնշում. մի՞թե սրանք են եվրոպական արժեքները: Եվ ինձ թվում է, որ մեր գործընկերներին հարկավոր է հիշեցնել այս մասին, իրենց սեփական իդեալների մասին»,- ընդգծել է Վլադիմիր Պուտինը: