Ռուսական «Գազպրոմ» ընկերությունը հոկտեմբերի 1-ից շուրջ 1.5 անգամ կնվազեցնի Ղրղզստանի հյուսիսին մատակարարվող գազի սակագինը՝ 224-ից հասցնելով 165 դոլարի՝ 1.000 խորանարդ մետրի դիմաց: Այս մասին հայտարարել է հանրապետության նախագահ Ալմազբեկ Աթամբաեւը:
Ըստ «ՌԻԱ Նովոստի»-ի, ապրիլին համաձայնագիր էր ստորագրվե ղրղզական ազգային գազային օպերատոր «Ղրղզգազ» ԲԲԸ-ի 100 տոկոս բաժնետոմսերը «Գազպրոմի» կողմից ձեռք բերելու վերաբերյալ: «Ղրղզգազ» ԲԲԸ-ի բոլոր ակտիվները փոխանցվել են «Գազպրոմ»-ին խորհրդանշական 1 դոլար գնի դիմաց:
Աթամբաեւի խոսքով՝ մի քանի օր առաջ անցկացված բանակցությունների ժամանակ ռուսական ընկերության ղեկավարի հետ կողմերը համաձայնության են եկել, որ «ընթացիկ տարվա հոկտեմբերի 1-ից «Գազպրոմը» երկրի հյուսիսին գազը մատակարարելու է 165 դոլարով՝ 1.000 խորանարդ մետրի դիմաց, այժմյան 224 դոլարի փոխարեն, այսինքն՝ գազը Բիշքեքում եւ երկրի հյուսիսային այլ քաղաքներում շուրջ 1.5 անգամ կէժանանա»:
Ավելի վաղ Ուզբեկստանը, «Ղրղզգազ»-ի հարցով Ղրղզստանի եւ Ռուսաստանի միջեւ պայմանագրի ստորագրումից գրեթե անմիջապես հետո, առանց պատճառը բացատրելու դադարեցրել էր Ղրղզստանի հարավին բնական գազի մատակարարումը: Գազանջատումը տարածաշրջանում էլեկտրաէներգիայի կտրուկ անբավարարություն էր առաջացրել, որը խորացել էր հանրապետության ՀԷԿ-երի ավազաններում ջրի աղետալի պակասի պատճառով:
Աթամբաեւը նշել է, որ դրա հետ կապված կողմերը պայմանավորվել են, որ «խոստացված 20 մլրդ ռուբլու ներդրումներից բացի, «Գազպրոմ»-ը եւս 45 մլրդ ռուբլի է հատկացնելու՝ «Հյուսիս-Հարավ» գազատարի կառուցման համար»:
