Ռուսաստանի նախագահի մամուլի խոսնակ Դմիտրի Պեսկովը հայտարարել է, որ Ուկրաինայի արեւելքում իրավիճակի կարգավորման համար Կիեւի իշխանությունները պետք է բանակցություններ վարեն Նովոռոսիայի հետ, քանի որ այդ հակամարտությունը Ռուսաստանի եւ Ուկրաինայի միջեւ չէ, այլ ներուկրաինական կոնֆլիկտ է: Այս մասին գրում է «ՌԻԱ Նովոստի»-ն:
«Չի կարող համաձայնություն լինել Պորոշենկոյի հետ հակամարտության կարգավորման շուրջ: Այդ անհնար է, քանի որ այդ հակամարտությունը Ռուսաստանի եւ Ուկրաինայի միջեւ չէ, այլ ներուկրաինական կոնֆլիկտ է»,- ընդգծել է Ռուսաստանի նախագահի մամուլի խոսնակը:
Պատասխանելով Ուկրաինայի հարավ-արեւելքյան շրջանների պետական կարգավիճակի մասին հարցին՝ Պեսկովը նշել է, որ Նովոռոսիան պետք է մնա Ուկրաինայի կազմում, եւ նրա կարգավիճակը պետք է որոշեն Կիեւի իշխանությունները:
«Եվ միայն Ուկրաինան կարող է համաձայնության գալ Նովոռոսիայի հետ, ուշադրություն դարձնել նրա շահերին, եւ միայն այդ կերպ կարող է քաղաքական կարգավորման հասնել»,- նշել է Պեսկովը:
«Մեկնաբանություններ են հայտնվել, որ նախագահը նշել է, թե դրանք բանակցություններ են Ուկրաինայի արեւելքի պետականության մասին: Եթե պարզապես ընթերցենք հայտարարությունը, ապա հասկանալի է, որ այդպես չէ: Նախագահը խոսել է նույն այն ներառական բանակցությունների մասին, որոնց անհրաժեշտության վերաբերյալ վաղուց է նշվել փաստաթղթերում, որոնք ամենասխալ ձեւաչափերով են ներկայացվել»,- Պեսկովի խոսքերն է մեջբերում «Ինտերֆաքս»-ը:
