10 տարի առաջ կատարվեց մեր օրերի Ռուսաստանի ամենաահավոր ողբերգություններից մեկը. Հյուսիսային Օսիայի Բեսլան քաղաքում գրոհայինները պատանդ էին վերցրել №1 դպրոցի 1 200 աշակերտի եւ ուսուցչի: Ահաբեկչական հարձակման եւ դրան հաջորդած գրոհի հետեւանքով զոհվել էր 334 մարդ, որոնցից 186-ը` երեխաներ: Ահաբեկչության պատասխանատվությունն իր վրա էր վերցրել չեչեն գրոհայինների առաջնորդ Շամիլ Բասաեւը:
Այսօր Բեսլանում սգո օր է: Ինչպես վերջին 10 տարիներին, այսօր էլ սեպտեմբերի 1-ին հազարավոր մարդիկ եկել են այն դպրոց, որտեղ տեղի էր ունեցել ողբերգությունը: Ի հիշատակ պատանդ երեխաների, ավերված մարզադահլիճի պատերի մոտ խաղալիքներ եւ ջրով շշեր են դնում, ինչի կարիքը պատանդները շատ են զգացել: Ողբերգության զոհերի հիշատակին կվառեն 334 մոմ: Սգո միջոցառումները կտեւեն երեք օր:
Բեսլանում զոհերին նվիրված հիշատակի միջոցառումներ տեղի կունենան նաեւ ՌԴ այլ քաղաքներում:
Ըստ հասարակական կարծիքի վերջին հարցումների` ռուսաստանցիները փոխել են իրենց վերաբերմունքը Բեսլանում գործողությունների ընթացքում ռուսական իշխանությունների նկատմամբ: Այսօր 62%-ը վստահ է, որ պատանդներին փրկելու գործողության ընթացքում իշխանություններն արել են հնարավոր ամեն ինչ: Մինչդեռ մեկ տարի առաջ այդ տեսակետին կողմ էր ռուսաստանցիների 46% -ը, փոխանցում է «Ռոսբալտը»: