Ես պետք է զբաղվեմ միայն խորհրդարանական քառյակի պահպանմամբ, որ նա հնարավորինս ակտիվացնի իր քաղաքական կյանքը: Այդ մասին լրագրողների հետ զրույցում ասաց ԱԺ նախագահ Գալուստ Սահակյանը՝ անդրադառնալով խորհրդարանական քառյակի հնարավոր պառակտմանը սպասվելիք սահմանադրական բարեփոխումներով պայմանավորված։
«Դրանից վատ բան ես չեմ գուշակում, որովհետեւ քաղաքական դաշտը ինչքան ալեկոծվի, այնքան առաջընթաց կլինի։ Ես պահպանողական եմ, եւ ինչ-որ ունենք ես ցանկանում եմ պահպանել։ Քառյակը քաղաքական համաձայնեցված կառույց չէ, նրանց համաձայնությունը հետեւյալն է. առանձին հարցերի շուրջ արձագանքել միասնական։ Նրանք ոչ դաշինք են, ոչ կոալիցիա են, ոչ էլ գաղափարական կամ սկզբունքային միություն»,- ասաց ԱԺ նախագահը:
Ըստ Գ. Սահակյանի՝ խորհրդարանական քառյակը խնդիրներ լուծելու հարց չունի, «քառյակը երեւույթը տեսանելի դարձնելու համար միավորվում է։ «Կարծում եմ, քառյակը պետք է իր խոսքն ասի, քանի որ չի կարելի, որ ասեն, «այո, սահմանադրական բարեփոխումներն անհրաժեշտ են, բայց մենք դրանք անենք 2017-2018 թթ.-ին»,- ընդգծեց Գ. Սահակյանը։
