Գերմանիայի արտգործնախարար Ֆրանկ-Վալտեր Շտայնմայերը զգուշացրել է զերծ մնալ Իրաքի հյուսիսում քրդական պետության ստեղծումից:
Hannoversche Allgemeine Zeitung թերթում հրապարակված հարցազրույցում Գերմանիայի արտգործնախարարը հայտարարել է, որ պետք է զգուշանալ մերձավոր արեւելյան երկրի հետագա պառակտման հետեւանքներից: Շտայնմայերը հետագա հետեւանքներ է անվանել «նոր սահմանների եւ պետական տարածքների համար նոր մարտերը», որն, իր հերթին, կհանգեցնի «լայնարձակ շրջանների անկառավարելիության»:
Շտայնմայերը հայտարարությունն արել է Գերմանիայի կառավարության՝ «Իսլամական պետության» գրոհայինների դեմ պայքարելու համար քուրդ զինված խմբավորումներին հակատանկային հրթիռներ եւ ականանետներ մատակարարելու վերաբերյալ որոշմանը զուգահեռ, փոխանցում է Deutsche Welle-ի ռուսական ծառայությունը:
Ըստ Շտայնմայերի` անհրաժեշտ է թույլ չտալ, որպեսզի քրդերը զենքն ուղղեն սեփական պետության դեմ կամ էլ այն հայտնվի իսլամիստների ձեռքում: Գերմանացի դիվանագետը կարծում է, որ ռիսկը նվազագույնի կարելի է հասցնել այն դեպքում, եթե սպառազինությունը մատակարարվի զինանոցներ ստեղծելու համար ոչ բավարար քանակությամբ, որոնք հետագայում կարող են օգտագործվել զինված հակամարտություններ հրահրելու համար: