Գնդեվազ գյուղի երիտասարդներն օրերս բողոքի ակցիա են անցկացրել Գնդեվազում՝ ընդդեմ Ամուլսարի հանքավայրի շահագործման եւ ցիանային ֆաբրիկայի կառուցման, հաղորդում է «ԷկոԼուրը»:
Ամուլսարի ծրագիրն իրականացնող «Գեոթիմ» ընկերության Տեղեկատվական կենտրոնի մոտ հավաքվել են շուրջ 40 գնդեվազցիներ՝ արտահայտելու իրենց բողոքը։ Իրենց հերթին «Գեոթիմ»-ի աշխատակիցները պատասխանել են, որ իրենք 6-7 տարի աշխատում են հանքավայրում եւ առողջական ոչ մի խնդիր չեն ունեցել։
Ակցիայի մասնակից, Գնդեվազի բնակիչ Կարեն Բարսեղյանի խոսքով՝ բնակիչները մտադիր են նամակ ուղղել ընկերության գլխավոր բաժնետեր Վերակառուցման եւ զարգացման եվրոպական բանկին (EBRD)՝ պահանջելով դադարեցնել Ամուլսարի ծրագրի ֆինանսավորումը։ Սկսվել է ստորագրահավաք, արդեն հավաքվել է 150 ստորագրություն։
Հիշեցնենք, որ Գնդեվազի բնակիչները հավաքել են 210 ստորագրություն մյուս գլխավոր բաժնետեր՝ Համաշխարհային բանկի մեջ մտնող Միջազգային ֆինանսական կորպորացիայի (IFC) Օմբուդսմենի գրասենյակին ուղղված բողոքի նամակի տակին՝ պահանջելով չֆինասավորել Ամուլսարի ծրագիրը։
Հիշեցնենք, որ IFC-ն եւ EBRD-ն Ջերսի Նորմանդյան կղզիներ օֆշորային գոտում գրանցված «Lydian International» ընկերության կանոնադրական կապիտալի տնօրինողներն են։ «Lydian International»-ը «Գեոթիմ» ՓԲԸ-ի 100%-անոց բաժնետերն է։