Թուրքիայի 16 նահանգներում սեպտեմբերի 1-ի առավոտյան համաժամանակյա գործողություններ են իրականացվել «Մեծ կաշառք» գործողությունն իրականացրած ոստիկանների դեմ:

Թուրքական Sozcu պարբերականի փոխանցմամբ՝ Ստամբուլում եւ եւս 15 նահանգներում իրականացված գործողությունների ընթացքում ձերբակալվել են 33 ոստիկաններ, որոնց մեջ են նաեւ նախկին բարձրաստիճան ոստիկաններ:

Ձերբակալված մի շարք ոստիկանների հագին եղել են շապիկներ, որոնց վրա թուրքերենով եւ անգլերենով գրված է եղել զրո: Նրանք բղավել են, որ իրենք զրո են, այսինքն՝ մաքուր են, իսկ հարամ փողերը չեն զրոյանում: Այս խոսքերը վերաբերվել են Մեծ կաշառք գործողության ժամանակ Էրդողանի եւ նրա որդու միջեւ հեռախոսազրույցի գաղտնալսմանը, որի ժամանակ Էրդողանը հրահանգել էր որդուն զրոյացնել տանը պահվող միլիոնավոր դոլարները:

Նշենք, որ 2013-ի դեկտեմբերի 17-ին Թուրքիայի մի շարք վայրերում տեղի է ունեցել համաժամանակյա գործողություն, որը ստացել է «Մեծ կաշառք» անունը։ Գործողության ժամանակ ձերբակալվել եւ այնուհետ կալանավորվել են նախարարների որդիներ, գործարարներ եւ պաշտոնյաներ։