Ադրբեջանական գերությունից վերադարձած՝ Տավուշի մարզի Վերին Կարմիրաղբյուր գյուղի 23-ամյա բնակիչ Արսեն Խոջոյանի վիճակը բավարար է, արդեն ջերմություն չունի: Այս մասին NEWS.am-ին ասաց ՀՀ առողջապահության նախարարության Մաշկաբանության եւ սեռավարակների գիտաբժշկական կենտրոնի տնօրեն Կարեն Բաբայանը:
«Բոլոր անհրաժեշտ հետազոտություններն արվել են, իր մոտ հայտնաբերվել է «վուլգար փսորիազ» հիվանդությունը, մնացած անալիզները բացասական են: Այս պահին բուժումը շարունակվում է, Արսեն Խոչոյանն իրեն անհանեմատ լավ է զգում, արդեն իսկ մտածում է դուրս գրվելու եւ տուն գնալու մասին: Սակայն մինչեւ սրացած վիճակը չհասցնենք ստացիոնարի, դուրս չենք գրի»,- ասաց նա:
Նրա խոսքով՝ ամբողջ բուժումն անվճար է, իսկ Արսեն Խոչոյանի առողջական վիճակն էլ գտնվում է առողջապահության նախարարի հսկողության տակ:
Հիշեցնենք, որ Տավուշի մարզի Վերին Կարմրաղբյուր գյուղի բնակիչ Արսեն Խոջոյանը մարտի 7-ին հատել էր ՀՀ ու Ադրբեջանի ԶՈւ շփման գիծը եւ գերի ընկել։ Ապրիլի 10-ին ԿԽՄԿ աջակցությամբ Արսեն Խոջոյանը հայրենադարձվել էր։ Արսենը վերադառնալուց հետո բողոքում է առողջական խնդիրներից, իրեն թույլ է զգում եւ ֆիզիկապես, եւ հոգեպես:
