Օդանավի ուղեկցորդուհին հրաժարվել է ուղեւորին փրկելու համար միացնել ավտոմատացված արտաքին դեֆիբրիլյատորը: Պատճառն ուղեւորի մազոտ կուրծքն է եղել:
Mail Online-ը հայտնում է, որ 62-ամյա Ջեք Ջորդանն օդանավում սրտի կաթված է տարել:
Նրա կինը` Քերոլայն Ջորդանը, որն ամուսնու հետ էր, պատմել է, որ բուժքույրը եւ ֆիզիոթերապեւտը փորձել են վերակենդանացնել իր ամուսնուն սիրտ-թոքային ռեանիմացիայի միջոցով, ընդ որում՝ ուղեկցորդուհին կտրականապես մերժել է մեկ այլ ուղեւորի` դեֆիբրիլյատոր օգտագործելու առաջարկը:
Նա լրագրողներին հայտնել է, որ իր որոշումը ուղեկցորդուհին հիմնավորել է նրանով, թե տղամարդը շատ մազոտ կուրծք ունի: Այրին քննադատել է ավիափոխադրողին՝ հայտարարելով, որ ավիաընկերությունից ավելի գրագետ անձնակազմ է ակնկալել, փոխանցում է FedPost.ru-ն:
«Նման հանգամանքներում անհրաժեշտ առաջին բանը, որ պետք է անել, դեֆիբրիլյատոր օգտագործելն է: Քերոլայնն ասում է, որ իր ամուսնուն անմիջապես օգնություն ցուցաբերելու եւ սարքը կիրառելու փոխարեն անձնակազմը որոշել է նախ սափրել նրա կուրծքը: Տղամարդն արդեն չի դիմացել մինչեւ գործողության ավարտը», - հայտարարել են փորձագետները՝ նշելով, որ դեֆիբրիլյատորները հատուկ դետալներով են տրամադրվում, որոնք օգնում են վերացնել օգնություն ցուցաբերելուն խոչընդոտող ամեն ինչ: